朝早食早餐嗰陣,我先有機會同Alain兩公婆傾偈,先知道佢哋唔淨止養蜂,近十年仲整麵包,呢兩年開始都有拎出嚟賣。
Alain後生嗰陣都有去過中東,不過係也門,或者因為咁,佢明白旅行者嘅需要,開始咗做Warmshowers嘅host。而Francoise?大概法國嘅女人都好係女人,都係一個母親,佢只係想拉近自己同個仔嘅距離。
帶住佢兩個送畀我嘅自家製麵包同香蕉乾,我開始喺法國嘅最後一段full day單車行。
亦係旅程嘅尾二嗰日。
喺度我想搞清楚一件事先,278日呢,就係去到London嘅日子,即係講緊呢日係第277日啦!咁之後我喺London係留咗一段時間,之後返咗香港同我老豆擺大壽,然後先飛返去踩埋去Manchester。可能心態上有改變,去Manchester嘗試喺Old Trafford搵工對於我嚟講變咗個bonus,做唔做到都係其次,所以基本上我就當London係我旅程嘅終點,之後嗰啲都係我生活瑣碎事。
好死唔死,之後喺Manchester錯手delete咗由London踩去Manchester嗰段時間嘅相,如果你哋真係有興趣嘅,可以hello冇圖嘅。
Calais就係其中一個去英國嘅港口
吖之前又唔記得講,到Paris之前,其實有諗過坐Euro Star直屌London嘅,因為心態上keep住有啲攰。不過就好似之前咁講,我又想繼續呢段旅程,又覺得都嚟到呢個位咯,冇理由唔踩埋佢,於是去到Paris之後,都決定繼續踩埋落去。
咁都覺得自己攞苦嚟辛嘅,不過就後話啦。
好狗唔攔路喎契哥
循住小路一直向Calais進發。途中有對放狗嘅夫婦截停咗我,傾咗幾句之後,竟然主動邀請我去佢哋屋企作客同留宿。收到出自法國人口中嘅邀請,其實我都幾驚訝,可惜當時已經買好咗之後嗰日嘅船飛,而且約好咗host,只好忍痛拒絕。
旅程中,不斷有一啲錯誤同遺憾,係我好想重頭嚟過。但係,人生就係咁,我哋只可以從錯誤中學習,唔應該再回首。
弊,講多咗廢話,唯有聽日再見。