London畀好多衛生城市包圍,或者咁講,相信好多巴打都去過London,佢分為唔同嘅zones,地鐵好似由1去到6,然後再出啲就要搭其他交通工具。Zone 1同2可以話係市中心,然後好多負擔唔起嘅人就會住外圍少少,於是Zone 3開始就有唔同住宅區域嘅誕生。
唔好以為住得離市中心遠就好偏,其實唔同區都會相應嘅配套,超市、餐廳同醫院等等一應俱全,基本上就係一個個唔同嘅小鎮。
London邊陲
一直向住市中心進發,從西南而嚟,要去到Tony同Angela屋企,咁啱要經過泰吾士河,呢條孕育住英國人嘅大河絕對係我希望快啲見到嘅景點,聽聞仲有河底隧道畀人步行過河嘅另一面,經過一座座民居,我心亦暗暗期待住一陣會係咩嘅景況。
呢個時候,發生咗一件柒到我依家都仲記得嘅事。
話說英國嘅燈位喺轉綠公仔嘅時候啲聲效係好似鬧鐘響咁,咁啱我一直從Dover過嚟都冇遇過轉咗綠公仔嘅交通燈,第一盞已經係London邊陲,見到前面轉黃燈,我就剎車停低。
燈位
作為一個單車手,好自然係停咗喺最近斑馬線嘅位,諗住排前啲起步先,唔使阻住身邊啲車。點知一停低,我就聽到交通燈嗰個鬧鐘咁嘅聲,仆街咁似警告嘅?我淆一淆,望到原來路面有個格仔係畀單車等燈位(見上圖),我就以為唔知邊度有個cam睇到我冇遵守交通規則,停咗喺格仔外面,嚇到我即係退後入返格仔入面!
之後知道原來每次綠公仔都係咁嘅聲,我就覺得自己當時好柒,身後啲司機一定心諗呢條友做乜鳩……
想知咩聲?自己睇吓:
https://www.youtube.com/watch?v=u1Qpc6DaiN4