2015年4月27號晚上9點幾,我終於到達Tony同Angela嘅屋企。
當Tony落樓開閘畀我嘅時候,雖然大家第一次見,但由於佢係我完成旅程後第一個見嘅人,仲要係香港人,我情不自禁咁攬咗佢一下,自己口噏噏咁:「終於到喇⋯⋯」
Tony帶咗我上去佢哋屋企,見過佢未婚妻Angela後,我涼都唔沖,就同佢哋打邊爐。
因為實在太攰太肚餓,基本上成日都冇乜點食過嘢。
喺我初出發嘅時候,Tony已經喺我Facebook page inbox我,邀請我喺London見面,仲話如果我改變主意,想留喺London而唔去Manchester,佢可以畀地方我暫住。當時只係多謝吓佢,諗住去到London最多留一排,遊覽吓就出發去Manchester,但因為旅程比預計嘅長,我需要5月尾返香港幫我老豆擺八十大壽,加上又覺得嚟到英國,冇喺最具代表性嘅首都住返一頭半個月都好嘥,就好厚面皮地借咗Tony Angela張梳化床嚟瞓。
呢張係我瞓過最舒服嘅梳化床。
席間傾開先知,佢兩位同我年紀差唔多,但比我厲害得多嘅係佢哋都係Cambridge畢業!Angela仲要依家喺London讀緊Phd,而Tony就喺一間大公司入面做緊。佢兩個絕對唔會係我嘅圈子所能夠認識嘅人,講緊唔係淨係我哋背景截然不同,而係我交開嘅朋友都係掏鳩輩,談吐、見識都好大分別。但因為呢個旅程,我哋竟然成為咗非常要好嘅朋友,仲痴飲痴食咗成個月,喺香港返去之後仲痴多陣。
我諗我跳出嘅唔止comfort zone,仲有friend zone。
當晚打打吓邊爐,Tony走咗埋雪櫃,隨口同Angela講咗句:「我哋好似仲有Oyster。」我一聽,耳仔都郁埋!喂使唔使咁客氣呀?買埋生蠔招呼我?點知Tony返嚟坐低,手上淨係揸住罐可樂。我一臉不解,大概Tony get到我諗乜,就解釋:「Oyster係London用嚟搭車嗰張卡。」
屌,做人咁為食做乜?