你老母係我阿嫂
2017-08-09 09:33:20
佢出咗去之後,我慢慢爬返起身,縮埋一舊喺床邊,諗緊下一步應該點做。
打電話求救?
咁夜邊個會仲未瞓呀⋯⋯我又唔知自己確實位置喺邊⋯⋯睇得地圖嚟蚊都瞓啦⋯⋯
搵機會衝出去?
係衝到嘅頭先一早衝咗啦⋯⋯我又唔知出面嚟咗個咩人⋯⋯萬一係個比佢更大隻嘅男仔咪弊⋯⋯
喺我苦苦思量之際,原來佢唔知幾時已經著返衫、著好褲,神色凝重咁行到嚟坐低喺床邊,仲捉住我兩隻手。
「做⋯⋯做咩呀?」
「Isabella,我⋯⋯我而家好驚,但又唔知應該點同你講⋯⋯」
「吓?發生咩事呀?」
「唉,我真係唔知點講呀。」
「你講到無頭無尾咁,搞到我都好驚⋯⋯究竟發生緊咩事呀?」
「總之⋯⋯我一陣要落一落街,而你今晚都唔可以留喺度啦。」
「即係我而家可以走?」我不禁心中暗喜。
「嗯。不過你隔十五分鐘之後先好走,記得呀。」
然後,佢就去咗洗手間稍稍整理一下儀容,梳返好個頭,跟住拎起屋企鎖匙同車匙。
啪。
佢就咁就閂門走咗,成間屋得返我一個。
所有事一下子嚟得太快,我完全消化唔切。但我真係聽佢咁講,隔咗十五分鐘之後先至離開呢度。
你老母係我阿嫂
2017-08-09 15:16:52
我拎起銀包一睇,果然得幾十蚊。唔夠錢搭的士,唯有行去最近嘅巴士站搭通宵巴士返屋企。一路上涼風吹來,我只好抱緊自己取暖,睇落同流浪漢相差唔遠。
返到屋企,已經接近凌晨四點。我連沖涼嘅氣力都無,就咁換套睡衣就攤上床。酒氣未完全散去,加上疲倦,我一瞓就昏睡過去。
然後一個翻身,我望見床頭鬧鐘,已經差唔多十二點。我捽一捽眼、坐起身,諗緊尋晚係咪發緊夢。
叮。
Aidan
在線上
「你覺得我哋算唔算曖昧?」11:51.
吓?點解佢問得咁奇怪嘅?
問人「算唔算拍拖」就有聽過啫,雙方要確認關係、畀返個名分對方嘛。但幾時開始連曖昧都要?
而就算答,我都唔知點答。遇到唔識答嘅問題,一係索性唔答,一係交返個波畀對方答。
「你覺得呢?」12:03.
我呢一秒傳送訊息出去,電話下一秒即刻震動起嚟。
Aidan
來電
佢⋯⋯到底搞咩呀?