你老母係我阿嫂
2017-08-14 00:05:36
「我以為你有男朋友先唔方便交換電話咋。」
「純粹覺得電話算係幾重要嘅資料,唔想亂咁畀人啫。」
「都啱,識得保護自己好緊要。」
換轉其他人,一定覺得我只不過搵藉口,然後,就沒有然後。估唔到佢竟然理解我嘅觀點。
「我諗嘢係咪好奇怪?」
「唔係吖。不過我知道你嘅嘢好少,想了解你多啲啫。」
「你問我問題吖。」
佢真係開始問我好多問題,譬如住邊、返咩工、邊度返工、興趣等等。呢啲問題,答一次又係咁,答十次又係咁,唔會因為問嘅人得意而變得得意咗。
「咁點解你會玩呢個App?」佢突然有日問。
「唔,因為生活無聊囉。」
「所以上網識男仔?」
「我想打發時間咋。」
「扮咩嘢啫?」
「真係因為咁㗎!」
嗱,其實我唔算講大話吖。無錯,當初我確實因為想分散對前度嘅掛念,所以試吓呢個稍為極端嘅方法。但到後來發生咗咁多事,我已經唔敢再抱識到男朋友嘅期望。
「有個人喺身邊陪吓自己係唔同啲嘅⋯⋯」
以前未拍過拖,會覺得愛情係一件好神聖、好難得嘅事。兩個人喺茫茫人海中相遇、相識、相知、相愛,每走一步都好唔容易。能夠成為心愛嘅人嘅伴侶,我諗可能真係要花盡一生嘅運氣。
但自從見證Regina甚至自己嘅初戀以失敗告終,我對愛情嘅睇法開始改變。愛情並唔係我想像中咁美好,現實啲講,可能只係寂寞嘅副產品。
「因為寂寞,所以搵個人拍拖,咁樣真係好咩?」