你老母係我阿嫂
2017-08-20 12:24:06
喺佢行開咗之後,我轉身行入倉拎貨。突然間,我隱約感覺到袋緊電話嘅褲袋入面震咗一震。為免又畀人捉到睇電話,我即刻行快兩步,忍到入咗倉之後先拎電話出嚟。
幻覺。
無未讀訊息。
「搞乜鬼呀?」
好唔容易等到放工,我一路行喺條街度,一路諗緊好唔好主動搵返佢。我先開一開返最後上線時間,睇到佢喺三分鐘前上過線。
「佢上過線,但唔係搵我⋯⋯」
「都係嘅,我哋玩緊遊戲㗎嘛。」
「唔知佢有無諗過搵我呢?」
直到搭完車返到屋企,我仲諗緊認唔認輸,終止呢場所謂嘅遊戲。只係玩咗大半日,我已經失魂落魄咁完全專注唔到,再玩落去真係唔掂⋯⋯而且,我原來真係已經習慣咗佢嘅存在。
「無點算㗎喎,順其自然囉。」
我突然諗起佢呢句說話。
人生係一場建立同失去嘅追逐。我哋不停建立緊好多關係嘅同時,亦失去緊好多關係。
自然流失佔咗大半,因為建立關係後無好好發展,即係彼此無一齊用心經營、維繫,感情慢慢被掉淡,最後變成掛住朋友名義嘅陌生人。當你意識到呢種關係消失緊,唔會覺得心痛,因為由一開始已經無好認真投入過。
人為流失佔咗另外嘅小半,當中有部分屬於不歡而散。不歡而散,意思係大家認真過去經營、維繫,但最後出現咗解決唔到嘅問題,唯有唔再聯絡先可以令彼此重過正常生活。當你意識到呢種關係消失緊,唔太會覺得心痛,因為好多時已經被憤怒拉走注意。
但我同Timothy呢?
我尋晚選擇喺關係最沸騰嘅時候離場,係咪真係一個最適當嘅決定?
你老母係我阿嫂
2017-08-20 16:41:48
「我認輸啦。」20:34.
最後,我又再一次當「矜持論」無到,死死哋氣主動喺WhatsApp搵返佢。
「你係咪覺得好好玩?」20:45.
掙扎咗差唔多一整日,呢句就係我得到嘅回應。
「嬲咗我?」20:47.
「無。」20:49.
「我知我今次過份咗⋯⋯」20:53.
「咁點解要咁?」20:56.
「因為⋯⋯我唔想依賴咗你⋯⋯」20:58.
事實上,我已經依賴咗佢。
「我咪講過順其自然囉,無啦啦玩乜呢啲咁無聊嘅遊戲啫?你而家當我咩呀?水泡呀?」21:05.
「唔好嬲我啦⋯⋯」21:08.
「請我食飯就原諒你。」21:10.
「畀個銀行戶口嚟,過數畀你。」21:12.
我以為講吓笑可以緩和返個氣氛。
「玩嘢呀?我要見你。」21:14.
「咁⋯⋯想幾時呀?」21:17.
「平安夜,你有無約人吖?」21:19.
係喎,原來好快就到平安夜。平安夜本來係信徒四出傳講耶穌降生消息嘅日子,後來演變成一大班朋友吃喝玩樂嘅假期,再後來更加成為情侶共享魚水之歡嘅佳節⋯⋯
咪住先!
唔通佢想同我⋯⋯
「未知呀⋯⋯再約吖。」21:23.
「好。」21:24.
佢繼續打,
「係啦,你下次偷睇完我,記得熄返個最後上線時間呀。」21:26.
「你偷睇我嚟呀?」21:27.
「咁你係咪偷睇我在先吖?」21:30.
我主動搵返佢,已經夠晒樣衰。如果我直認埋,咪以後都唔駛做人?
「創作力量和幻想⋯⋯」21:34.
「好囉,咁當係我幻想囉。不過我就真係因為緊張你、著緊你、掛住你先偷睇你嘅。」21:38.
我送佢一個面紅微笑嘅表情。
本來諗住趁感情未係好深嘅時候抽身會無咁痛,點知結果都係走唔到。今次唔得,到下次感情再深啲嘅時候,已經唔會想走。
算啦。或者⋯⋯真係應該順其自然啦。