一世人流流長,總會愛上幾個……

993 回覆
208 Like 21 Dislike
2017-07-15 21:11:33
第200個留言都係我嘅
2017-07-15 21:56:57
如果等到就會繼續信。
睇到好痛 樓主加油
2017-07-15 23:15:25
如果等到就會繼續信。
睇到好痛 樓主加油

多謝你呀,呵返
2017-07-15 23:35:04
同Regina 一樣同男朋友一齊咗5,6年
睇完之後覺得同自己好似 但已經分唔到對佢係習慣對係鍾意
2017-07-15 23:51:51
同Regina 一樣同男朋友一齊咗5,6年
睇完之後覺得同自己好似 但已經分唔到對佢係習慣對係鍾意

感謝你嘅留言
令我知道我嘅文字可以引到你哋共鳴
新手上路有好多地方寫得唔夠好
希望漸見佳境

我嘅小小意見係
有一部分人習慣咗另一半嘅存在
無咗一開始嘅激情就以為已經唔鍾意
但其實激情過後嘅感情先係最難能可貴
希望你同男朋友幸福快樂
2017-07-16 00:44:50
「你哋好呀⋯⋯你哋有組未呀?」

「未。」佢哋異口同聲答。

「咁不如一組吖?我哋差兩個。」

「無所謂,好吖。」

「Okay呀。」

我哋四個輪流自我介紹完,我就喺袋搵本筆記簿,撕出一頁,叫佢哋寫低英文全名,再將名單交畀老師。以前中學分組只不過柴娃娃,但而家大學分組就有機心得多啦。(好彩組員唔知我係danso人)

老師點一點數,收齊名單就開始教書。至於教咩,我無咩心機聽呀,反正都係嗰啲無聊嘢啦。

「一陣落咗堂有咩做呀?」

「我報咗書法班,落堂就直接去。」

「吓?搞咩呀,你啱呢味嘢架咩?」

我成日覺得,得阿公阿婆先會寫書法。

「咩都試吓呀嘛,學書法可以培養氣質呀。」

Regina最近多咗好多興趣,話橫掂平時無咩做好得閒喎,所以落堂之後急急腳就走咗。

距離今晚選拔仲有啲時間,食飯又好似太早,行街又好似太趕⋯⋯好唔好去練舞呢?但又唔想逼得自己太緊⋯⋯咁唯有去圖書館睇吓書當休息。
2017-07-16 11:08:49
行去圖書館嘅途中,身邊路人不絕,唔大唔細嘅休憩空間坐滿學生、情侶、一家大細,甚至連老人家都有⋯⋯商場入面應該設立更多座椅,畀行街行到攰嘅人休息吓。

入到圖書館,我轉右直行到最入。雖然我讀BBA,但唔鍾意睇商業類嘅書,反而只對文學類有興趣。詩呀、詞呀、散文呀、小說呀,得閒就搵嚟睇吓。有人問過我點解唔讀文科,我一笑置之。呢度係香港,讀文科等乞食咩?

我隨意望吓書架上有咩書啱睇。我一路睇,一路向右行,可能睇得太投入,完全唔知隔離企咗個人。我再右行一步,唔小心撞到佢。

「對唔⋯⋯咦?咁啱嘅?」我用氣聲問。

「係囉,咁啱嘅?」對方用氣聲答。

「落咗堂無咩特別嘢做,咪過嚟囉。」

「你無睇到我WhatsApp呀?」

「無呀,」我即刻喺袋度拎電話出嚟,「頭先上堂校咗靜音呀,Sorry。」

「唔緊要,想問你得唔得閒練舞咋嘛。」

「就係唔想練⋯⋯想放鬆吓。」我吐吐舌。

「都啱嘅,哈哈。」

「呢本係咩書?」我注意到Wallace拎住本書。
2017-07-16 19:59:37
「《人間失格》。」

Wallace呢期將佢個頭變咗做橄欖綠色,襯返佢一身偏黑嘅膚色,都幾好睇。佢著住一件白色鬆身背心,配上穿窿淺藍色牛仔長褲,比起平時多咗幾分文青氣息。

「本書講咩㗎?」

「呢本書係一個日本作家叫太宰治寫嘅,係佢嘅半自傳式小說。書名嘅意思係喪失作為人嘅資格。」

我從佢手上接過本書,揭咗兩揭。

「主角由細到大為咗逃避現實,不斷做好多墮落嘅行為,例如濫藥同自殺,抒發自己內心嘅鬱悶同希望被愛嘅渴望。最後⋯⋯」

「最後點呀?」

「唔話你知,想知就自己睇。」

「唔想知喎。」我將本書還畀佢。

「幾好睇㗎,你有興趣就睇吓。」

佢想將本書塞落我懷中,但我一個轉身避開。

「好呀,下次吖。」

「你幾點走呀?」

「我諗住坐多陣先⋯⋯你呢?」

佢望一望電話,「唔⋯⋯可以留多一陣。」

「咁我都拎本書先。」

我隨手喺書架上拎起張愛玲嘅《半生緣》,跟住同佢一齊去搵個位坐低,打發時間。
2017-07-16 21:44:45
我哋坐低喺附近嘅兩張一人梳化,中間有張茶几。我坐喺佢對面,偶爾換換坐姿嘅時候都會微微抬頭望佢,佢總係好專心咁睇緊本書,坐姿好似無咩點變。

大半個鐘後,我注意到佢拎住本書起身。

「我走先啦,等陣見。」佢用氣聲同我講。

「等陣見。」我同返氣聲回應佢。

隔咗一陣,見時候差唔多,我都離開圖書館,行去附近屋邨隨便食個飯。嗰度有間幾出名嘅茶餐廳,算係呢度學生嘅飯堂。佢嘅凍忌廉朱古力雖然無咩特別,但嚟呢度食晚飯唔可以唔嗌返杯飲。

匆匆食完,就返大學向鏡房方向走去。行到門口對出嘅一塊小空地,已經見到唔少人聚集喺度拉緊筋或者mark緊動作。

我喺人群中見到同班嘅阿瑤、Debbie同Kelvin,就走埋去打聲招呼。
2017-07-17 01:09:14
「你哋到咗好耐啦?」

「啱啱到咋,多人到想搵個位拉吓筋都好難。」

「係囉,又會咁多人嘅,」我感覺自己手心開始冒汗,「唉,好緊張呀⋯⋯」

「定啲嚟喎,越緊張越跳唔出水準呀。」

「我本來就無咩水準⋯⋯」我苦笑。

「點會呀?我哋班入面,明顯你進步最快。」阿瑤講完,Debbie同Kelvin一齊點頭同意。

「大把人跳得好過我,應該無機會啦⋯⋯」

「說話就唔係咁講啦,對自己要有信心!」

呢個時候,Connie忽然喺鏡房行出嚟,叫所有準備參加選拔嘅人排隊點名。我同阿瑤佢哋一齊排隊,點完名就入去鏡房坐低,等。

Wallace頭先咁急走,原來係要早啲過嚟準備。佢一早已經喺鏡房入面,同兩個我未見過嘅人傾緊計。
2017-07-17 05:08:25
好似我間學校 好有共鳴感
好好睇 樓主加油
2017-07-17 07:55:14
好似我間學校 好有共鳴感
好好睇 樓主加油

你咁早嘅
唔會爛尾,放心睇
2017-07-17 18:19:49
選拔以小組形式進行,每隔十分鐘就隨機叫四個人準備。參加選拔嘅人保守估計有百一、二個,即係最後一批至少要等五個鐘⋯⋯

平時練習,總以為鏡房長期壞冷氣。今晚先知,原來呢度可以咁凍。我越坐越凍,越凍越緊張,越緊張越坐立不安。同玩跳樓機嘅原理一樣,最可怕嘅並唔係驟降嘅一瞬,而係漫長、未知嘅等待。

「……、林書予。」

十點,終於輪到我。

呢個時候,阿瑤佢哋一早跳完,得返我一個喺度等到就變雪條。而我已經等到唔識緊張,淨係好想快啲跳完返屋企。

我同另外三個人跟住Connie入到隔離鏡房,按剛才叫名嘅次序順序面向落地鏡一字排開。Wallace同頭先嗰兩個人一齊坐喺鏡前,面向我哋。

「嗨,首先多謝你哋今晚出席!我就唔駛介紹啦,側邊呢兩位係今次孖釘freshmen team嘅排舞老師,Zoe同Jonathan。」
2017-07-17 19:01:18
Zoe束有一頭短金髮,頭戴紅色髮帶,雙耳掛住一對流蘇耳環。佢樣貌唔算出眾,但睇落好有性格。唔知係咪跳舞嘅人都習慣浮誇妝扮,佢嘅一雙smokey eyes特別吸引到我嘅目光。

「你哋唔駛太緊張嘅,成個選拔過程好簡單,」

聽多幾次安慰說話,就知其實無咩實質作用。正如叫人唔好喊,對方反而喊得更勁一樣,叫人唔好緊張根本等於令人更加緊張。

「因為時間關係,你哋陣間淨係可以跳一次。音樂播完之後,我哋想你哋自由發揮跳多廿秒左右,咩動作都可以。」

吓?

「有無其他問題?」Zoe繼續講。

剛才我係最後一個被點名,所以企到最近門口嘅位置。Wallace坐喺我嘅右邊,同我打成一個大斜角。等我哋所有人準備好,Wallace就開始播音樂。

接落嚟嘅一分鐘,過得好快。
2017-07-17 19:38:22
好似我間學校 好有共鳴感
好好睇 樓主加油

你咁早嘅
唔會爛尾,放心睇

個陣仲未訓
2017-07-17 19:57:47
好似我間學校 好有共鳴感
好好睇 樓主加油

你咁早嘅
唔會爛尾,放心睇

個陣仲未訓

咁今晚睇完文早啲瞓啦
2017-07-17 22:03:11
當我回復意識嘅時候,發現自己兩手垂直、企喺原地。另外三人,一個單手倒立、一個作拱橋狀、一個成一字馬。

「唔該晒。如果通過選拔嘅話,應該呢一兩日就會收到通知。」

佢哋聽到Zoe咁講,紛紛好似我咁企返直個人。而我,從頭到尾都喺剛才端正嘅站姿。

「如果無其他問題,你哋可以離開啦。」

我感覺到,從音樂停止之後就有一道熱切嘅目光由我右邊傳嚟。只係,我無辦法正面接收。

我一個左轉,向鏡房門口匆匆走去。我一路上緊捉住布袋,垂頭直奔地鐵站。我一直唔敢睇電話、唔敢向後望,好怕睇到任何訊息,或者見到任何暫時唔想見嘅人。

返到屋企,我直接行入睡房拎起睡衣,然後去廁所沖涼。除低衫褲、行入企缸、扭開掛喺頭頂上嘅花灑。我用力合上兩眼,任由源源不絕嘅水沖刷我身體每一處。

唔知過咗幾耐,我伸手去閂花灑、撥一撥身上多餘嘅水、行出企缸、拎毛巾抹一抹全身再包住頭髮、著返睡衣、開風筒隨便吹乾頭髮、刷牙、返房。

睡房盞天花燈一直無開著,床頭燈都係。我就咁摸黑上床、冚被、合眼、瞓覺。

呢一晚,快啲過去。
2017-07-18 02:32:57
「女,女呀⋯⋯女!夠鐘起身啦!」

第二朝,我聽唔到鬧鐘響,差啲起唔到身返學。好彩媽媽臨出門口前叫一叫我。我眼都未開,摸吓自己床頭,咩都摸唔到⋯⋯電話呢?

我睡眼惺忪地爬落床,先至醒起電話仲喺尋日拎嘅布袋入面。我終於攞出嚟,一睇,無收到任何訊息,只得幾個來自Regina嘅未接電話。

一番梳洗之後,我匆匆搭電梯落到地下大堂,正好遇到Regina喺另一部電梯行出嚟。

「喂,你搞咩呀尋晚?打畀你唔聽嘅?」

「一早瞓著咗,做咩?」尋晚的而且確好早瞓。

「諗住問你結果點咋。」佢大概指選拔結果。

「唔好問我。」

「唔問你,問邊個呀?」

「唔知呀。」

「幾時出結果呀?」

「都話唔好問我囉。」

「古古怪怪咁⋯⋯發燒呀你?」

佢試圖伸手到我額前,我一手撥開咗。我懶得解釋尋晚嘅事,而佢見我態度冷淡,亦無再糾纏落去。
2017-07-18 02:52:21
叮、叮、叮。

由我出屋企門口開始,部電話不停響起訊息聲。平日同我最多訊息往來嘅,就係我身邊呢個女人。佢既然已經喺我隔離,斷估唔會無聊到隔部電話撩我傾計啩。

咁仲會係邊個搵我?

選拔完咗,意味住training class都已經完咗,以後唔再需要日夜練舞。一諗到,以後放學唔駛再趕頭趕命食晚飯、唔駛再屈喺焗促嘅鏡房同一大班人一齊練習、唔駛再逼自己重覆又重覆聽同一首歌,心情似乎輕鬆唔少⋯⋯

但有時,心頭又會一緊。

腦海中忽然閃起Regina上次提過嘅二十一天效應。呢一個月話快唔快,話慢唔慢,練舞確確實實成為我每日放學後嘅指定動作,不知不覺養成咗習慣。

不過,任何習慣都可被取代,只需要二十一日。由今日起開始計二十一日,我一定可以養成戒走呢個習慣嘅習慣。

放學後獨自回家嘅車程上,我終於打開WhatsApp訊息。
2017-07-18 06:58:26
早晨一推
2017-07-18 12:20:49
文呢????
推爆你
2017-07-18 15:44:11
文呢????
推爆你

嚟,畀你

放工出!
2017-07-18 15:50:00
次次見到regina呢個名 就諗起葉劉
2017-07-18 16:27:29
文呀樓主......
2017-07-18 16:33:05
次次見到regina呢個名 就諗起葉劉

個個都咁重口味
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞