(多圖多字有抒情)我驚我有一日會唔記哂

347 回覆
412 Like 3 Dislike
2017-07-10 12:16:54
“你想知道係咪唔記得左嘅時候﹐你反而會記得更加清楚。我曾經聽人講過﹐當你唔可以再擁有嘅時候,你唯一可以做就係令自己不要忘記。”《東邪西毒》



多謝大家入嚟睇呢個標題咁模棱兩可嘅POST﹐呢個POST係一篇遊記。
一篇關於係兩年半前我同一個朋友攞住部單車去中東踩左四個月嘅所見所聞。完左呢個旅程後﹐好多片段不時都會係我腦海閃過。其實一直都想係當年嘅高登打一篇遊記記錄下﹐不過就一直都提唔勁去寫。最近我分左手﹐我好痛﹐痛到自己都唔知點形容。但由於年紀都唔算細﹐有時要變嘅野你點都控制唔到﹐唯有就係學識盡快去放低。打呢遊記正正就可以俾到我一個寄託。同時希望同巴絲打吹下水﹐令到時間可以過得快d﹐重新出發。

當時我大學畢業返左一份好辛苦嘅工﹐日做20小時、兩個星期無得放假都係等閒事。接近三年非人道工作經歷﹐可能太忙又無拖拍嘅關係﹐無地方可以洗錢。最終我有一筆唔少數目嘅儲蓄﹐一筆夠我一年唔需要做野去旅行嘅錢。呢次旅行之前我其實無咩點去過旅行﹐成世人第一次坐飛機係因為公司派我去上海; 第一次出國係因為公司去台灣旅行。慶幸屋企家庭負擔唔算大﹐人又了無牽掛﹐所以我決定辭職放一個長假期; 用一個有別於一般旅行方式嘅方法去見識呢個世界。



以上就係我同朋友決定嘅路線圖﹐由土耳其伊斯坦堡開始經格魯吉亞、阿美利亞、再橫誇整個伊朗到南面阿巴斯港。最後坐船到阿聯酋就完成整個旅程。全長約4500KM。

PS.
1. 序係想交代我去旅行同打呢篇遊記嘅目的,我唔係想威想俾人知道我點勁。完左呢次旅程之後﹐我經常都同人講一句說話: 係人都可以架﹐只要你敢同信自己就得。
2. 我記得一篇非洲踩返香港嘅遊記俾當年高登仔插到返哂艇。因為佢有坐車,瞓酒店, 坐飛機等。好老實﹐我地成程好大部分都係住酒店﹐都有坐過車。不喜歡的話﹐就當係一篇普通遊記算啦。
3. 當年呢程旅程係收到少少嘅Sponsor﹐所以有少量廣告成分。希望唔好介意。
2017-07-10 12:18:25
留名等睇,巴打加油
2017-07-10 12:27:41
亞美尼亞居然冇去lake sevan
土耳其沿黑海條路唔易踩
2017-07-10 12:29:31
LM
2017-07-10 12:41:54
支持
2017-07-10 14:50:05
亞美尼亞居然冇去lake sevan
土耳其沿黑海條路唔易踩


無去到呀, 可能因為係冬天關係
2017-07-10 15:54:09
前篇

係我辭職之前大約三個月到﹐我就同我朋友開始計畫呢個旅程。大家都有一個共識去一D特別少少﹐唔好太發達﹐當地人會比較熱情同可以感受當地文化嘅國家。所以大部分歐洲國家就可以剔除。我就提議中東土耳其啦。點解土耳其? 好老實﹐係因為成龍。細個睇佢套《特務迷城》時﹐就覺得呢個國家好神秘同好靚。另外去伊朗係因為佢係旅遊聖經Lonely Planet 極力推介﹐有別於一般嘅旅行國家。就係咁就決定左初步路線。同埋係咁依諗左今次旅行個theme﹐叫DARE TO DREAM。其實都係名一個﹐無咩特別關係同深層意義。

有必要先介紹一下我同行朋友。佢係我大學其中一個同學兼朋友。大學畢業後﹐佢就已經由四川踩單車上過西藏。出嚟做野後亦踩過新疆、巴基斯坦同尼泊爾。所以佢係絕對有好多單車旅行經驗﹐令我可以係準備階段輕鬆唔少。



(照片由朋友提供)

出發之前﹐先去左深圳一間專門生產同網售旅行單車嘅工廠﹐一來要去買單車同裝備﹐ 二來要去學點樣砌拆單車, pack單車等。




(其實個樣就唔係唔見得光﹐只係係網絡世界有返少少私隠好D。知我地係邊個嘅朋友們麻煩都唔好爆我地出嚟)

我同香港大部分人一樣﹐接觸單車嘅機會就係一年都唔知有無一次一班fd去大埔踩去大尾督。自己都叫有玩下運動﹐體能都尚算可接受。咁就係出發前幾日係屋企踩去屯門叫做練習下啦﹐一日半日嘅練習﹐ 仲要無任何負重下作用當然就唔會大啦。不過都係嗰句 ”你信自己得就會得架喇。”
Photo 6
係14年12月30號﹐我地就正式開始我地呢次旅情。由香港經約旦轉機到伊斯坦堡。


PS.
1. 我唔會旅程一日一日咁分享﹐只係順次序咁一件一件將值得嘅事情記下來。
2. 希望每日都可以更新到﹐星期六日就應該唔會更新。
3. 大部分景點我都只會略略講下﹐貼一兩張相。如果想用呢篇遊記做旅行攻略﹐應該就唔會太適合。
2017-07-10 16:15:16
留名
2017-07-10 16:30:07
追po
2017-07-10 16:40:38
劉鳴
2017-07-10 16:40:49
我都好想去一次呢種可以講一世既旅行
2017-07-10 17:28:27
點解有槍
2017-07-10 18:24:43
點解有槍


佢話當年踩巴基斯坦時 有段路有恐怖份子 所以沿途會有警察保護佢地 佢就借左人支搶影相
2017-07-11 12:21:40
12月31﹐一年嘅最後一日﹐亦係新一年嘅開始。我地到左伊斯坦堡機場。我記得當日落住好嘅大雨, 又大風。係機場搵車到hostel唔係咁容易﹐因為我地有兩箱大單車。係機場時因為我地兩箱大單車嘅關係﹐有人走埋嚟問我搞咩。我地同佢講係嚟踩單車由土耳其去伊朗。佢回左我一句: not a good day for cycling. Is rainy and winter season in Turkey now. 呢一刻我地當然知道我地揀錯左日子﹐不過人生就總係有d瘋狂﹐點會咩都計畫好哂丫。




返到Hostel 後﹐我地就馬上拆箱砌單車。砌完食餐晚飯後﹐由於太累嘅關係我地好早瞓左無去倒數﹐明明Taksim Square就係我地Hostel 隔離。之後兩日都係去下景點, 買Sim Card咁:



聖索菲亞博物館教堂

藍色清真寺


巴扎

兩日後﹐我地就正式開始左我地單車之旅


約40KG重既單車
2017-07-12 05:39:01
Lm
2017-07-12 06:00:32
Lm
2017-07-12 06:54:19
支持💪
2017-07-12 15:26:18
相信一個普通人都唔會點有機會踩一架40KG重嘅單車﹐第一日我可以話係連扶起架車嘅力都唔夠。都用左一段時間先可以攞到架車嘅平衡。值得慶幸嘅就係當日終於停左雨﹐算叫係一個唔錯嘅開始。


我地一早就出發﹐ 沿住一條叫D100公路出發﹐去到五六點都只係踩左50KM。而且我已經廢柴到抽左筋﹐被迫係一個公路旁嘅不知名小鎮休息﹐個小鎮叫Osman Yılmaz。不過就唔太知點解有間Holiday Inn係公路旁。就安慰自己第一日啫﹐俾自己住好D休息好D啦。


晚餐 – 其實就唔太食慣土耳其餐﹐佢地通常都有沙律﹐湯, 麵包等好多前菜(你唔點都會俾你)。同埋好多小餐廳都係無價錢牌﹐要埋單先知幾多錢。唔通係有公價?


第二日雖然隻腳仲係好酸軟﹐但開始有D習慣。嗰日就踩左90KM﹐算係一個好大嘅進步啦!

係第三日我地就遇到我地路途中第一隊單車隊﹐係由3男1女嘅法國人組成。佢地係法國出發踩左兩個月到土耳其。咁代表D咩? 代表佢地踩一下油我地車尾燈都見唔到囉!我地先第三日咋!

點解佢地踩左兩個月仲可以鬼死咁白淨靚仔﹐洋腸大哂咩!
2017-07-12 21:15:50
自推下先
2017-07-12 22:00:51
Pish
等緊你出文架!
2017-07-13 17:25:09
要嚟嘅總係會嚟嘅﹐要面對嘅就總要面對。


係機場時就有人同我地講﹐依家唔係適合時候係土耳其踩單車。去到第4日時﹐我地終於要面對下住半雨半雪嚟嘅天氣。


唔個大家留唔留意到呢?其實我係一個死四眼仔嚟架。我唔係對四眼仔有咩偏見。我係想話俾大家知道﹐當你落住雪嘅時候踩單車﹐雪會不斷落係眼鏡上再溶成水阻檔你視線。再加上戴左面罩保暖﹐ 呼吸時嘅霧氣又會搞到睇唔到嘢。所以成日要停低抺眼鏡﹐好麻煩!


中午就係路旁停低餐廳食飯。土耳其好多暖爐都仲係燒木燒炭架﹐另一方面可以用埋嚟煲茶。我地呢?就用佢嚟烘乾對襪。


唔知佢地係咪太無野做嘅關係又唔怕凍﹐佢地係餐廳門口堆左個雪人。


晚上我地停左係一個叫Kaynasli嘅小鎮。可能係小鎮嘅關係﹐唔多會有外國人出現。我地係酒店樓下餐廳食晚飯時﹐一大班後生仔對我地好熱情﹐又幫我地翻譯餐牌又吹水咁。當然地﹐其實佢地只係識簡單單字﹐好多時係雞同鴨講架。
2017-07-13 19:38:06
自推
2017-07-13 20:08:33
Pish 已留名
2017-07-13 22:21:21
2017-07-14 17:44:59
條路會好難行﹐但你已經無得再返轉頭。



接住嚟嘅幾日開始接近中部地區﹐雪只係越落越大﹐ 。香港人可能會好開心, 因為好少見雪。但當你係戶外踩住單車﹐你會想死。


我記得當日係今次旅程第一次山路﹐但竟然遇上到大雪。對一個新手嚟講何其辛苦!


落雪踩單車有咩問題?除左睇唔清路同好易炒車外﹐你係連想飲啖水都無得飲呀!!



上山途中係山腰見到間餐廳﹐我地真係屌唔住要入去飲杯土耳其茶。係落雪嘅日子﹐一杯土耳其茶就係可以幫你暖身暖心。我好記得呢間餐廳﹐除左雪山上無啦啦有間餐廳出現外﹐亦因為我地飲完杯茶時老板話唔收我地錢。



千般不捨離開左間餐廳後﹐就繼續係雪山上慢步向前。突然有架車停係我地面前﹐有人落車Set 哂Cam咁。原來佢地係一間土耳其嘅網絡電視台﹐大概係心諗咁凍咁大雪下﹐做咩有兩個白痴係到踩單車。問嘅問題都係D老土問題﹐點解你地要咁做呀﹐打算踩去邊呀等等。當時我心諗可唔可以問快D呀﹐我地因為踩緊個身會熱就無著好多衫﹐但一停低訪問就會凍死。佢最後問我地有咩想講﹐我講左句: I love my mother! 佢無好支持我今次呢次旅程﹐但都無反對。只係話左我一句︰得閒過頭呀?


當晚我地踩到天都黑哂﹐終於都係路旁嘅小城搵到間賓館。一張大床一張細床﹐我猜包剪揼輸左要瞓細床。最後我個朋友俾蚤患煩左一個星期。
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞