除左夜遊見識之外﹐其實Giorgi都有盡地主之誼帶我地去其他景點。
聖三一大教堂
其中一晚﹐佢就同佢姐夫帶左我地上山頂睇夜景。中間發哂光嘅就係聖三一大教堂
Giorgi同佢姐夫
(無影相﹐網上偷圖)
Giorgi都同我地玩左好幾日﹐其中一日就同佢地去左浸上面個硫黃溫泉。聽佢地講係古時有個皇帝發現呢個溫泉﹐又好鍾意浸架喎。無錯﹐我係同佢地玉帛相見過。
格魯吉亞有一樣野好出名﹐就係酒。佢地聲稱格魯吉亞係其中一個最古老釀製酒嘅地方。所以其中一日Giorgi就車左我地去一個郊區酒莊品酒(鬼識分好唔好飲咩)。
大家唔好幻想係法國嗰D大酒莊園﹐其實就係只一個農村嘅自家製小酒莊咁﹐唔太大的。雖然唔太大﹐但都算係雅致嘅。
試酒時會有麵包同芝士俾我地送酒。上面嗰杯就係佢地講嘅”黃金水”﹐係一杯金黃色嘅白酒。
聽佢地講格魯吉亞人係好飲得架。嗰日我地好似都飲左幾多下﹐回程時大家都有D High High 地﹐再係車上面播住一D American Old Song﹐個mood即刻出哂嚟。其實我一直都唔係太識飲酒﹐無論係啤酒、紅酒、白酒定烈酒都好﹐都唔太識點為好飲﹐我只係享受酒後酒精引發嗰種氣氛。(同行佢地有另一個朋友一齊嚟﹐佢係成日都無飲到酒負責幫我地開車﹐真係萬分感激)