一場公司飯局，我們的命運從此改寫

目錄

第一章：離奇消失
第二章：警察問話
第三章：性騷擾
第四章：罪
第五章：傳說中的大客
第六章：暫時放開懷抱
第七章：牛角會議
第八章：開始失序了
第九章：人妖殺人
第十章：某君的癖好
第十一章：河畔夜話

(待續)

(第一章：離奇消失)

「好野喎，比你搞店左個大客！」我大讚樂仔。

樂仔係我地sales team既新力軍，大學畢業後加入公司，做左短短一年，成績已經好標青。

我叫Karson，今晚係我地團隊既Happy Friday飯局，出席既有郭Sir、Felix、我、Michelle、TT同埋樂仔，重有一位組員Jason，因為老婆大左肚，想多d時間陪老婆，所以今晚無黎。

我地飯聚既地方，係旺角瓊華中心牛角燒肉專門店。

「各位大佬過獎啦，」聽到我讚佢，樂仔臉帶微笑，謙虛道。「都係全靠近一年來跟到各位阿哥阿姐學野啫。」

我今年廿八歲，入左行六年，好耐都無見過好似樂仔咁有前途既新人，笑容友善，醒目但又唔會囂張。

上一次我覺得好有前途既新人，係兩年半前加入既Michelle。

「果然好野，今時今日好少後生仔好似你咁謙虛，抵d客冧你既！」Felix都加把口一齊讚樂仔。

Felix既職級同我一樣，都係Assistant Sales Manager，當年我地差唔多時間加入公司，可謂同撈同煲，有單開既日子一齊舉杯慶祝，無單開既日子一齊借酒消愁。

「全靠你教識我待客之道啫Felix哥，小弟重有好多野要向Felix哥同埋咁多位好好學習。」樂仔說。

「好啦好啦，坐低左咁耐，叫左野食先啦，」郭Sir說。「Michelle，拎個menu過黎吖。」

郭Sir係我地團隊既阿head，年紀約莫四十出頭，在行內擁有良好的人脈和豐富的經驗。

Michelle在檯邊拎左兩份餐牌同埋一部用黎落order既iPad出黎，分別遞給郭Sir、Felix和我。

「大家都係食肉獸，都係狂叫肉食架啦，」我一邊翻著餐牌一邊說。「叫兩個拼盤，再加d野大家share食……牛舌一碟有五塊，咁叫兩碟囉，反正TT食一塊都唔夠喉架啦。」

「都唔係呀大佬……哈哈，我食一塊夠晒架啦。」坐在我斜對面的TT不尷不尬地說。

TT係一名高大肥仔，身高約六尺一吋，經驗同我差唔多，不過佢sell客既時候臨到close deal會好緊張，因此往往連放到埋口既肥豬肉都食唔到，所以成績一向麻麻地。

「咁叫兩碟牛舌……兩碟Prime安格斯牛，」Felix接口道。「Michelle，你有無咩想食？」

「我無所謂呀，你地中意食咩就叫咩啦。」Michelle說。

「咁吖，」Felix考慮著。「我記得你好似對海鮮敏感，咁不如叫羊肩啦。」

「唔洗就我啦，」Michelle說。「不如叫個海鮮湯比郭Sir同大家飲啦。」

「唔緊要，樣樣叫d啦。」郭Sir笑說。

然後我地決定左食咩，Felix就用iPad落單。

隔左一陣，有位女侍應行過黎，係一位長頭髮做左金色highlight、雙眸戴左一副大眼仔con既妙齡少女。

此刻我並唔知道佢叫咩名，日後我會知道，佢個名叫Yumi。

「大家好，歡迎光臨牛角，不如趁用餐之前，我同大家介紹一下唔同既醬油同餐具係點用吖。」

接著Yumi純熟地為我們逐一解釋，例如邊款醬油配咩食物、夾生肉和熟肉又分別應該用咩工具。

「各位，我地而家做緊promo，只需要比二百蚊就可以做會員，請問各位有無興趣呢？」

Felix同我已經係會員，所以都無出聲。一陣短暫的沉默後，我意識到其他人都無興趣。

始終大家都係sales，我就好聲好氣咁同Yumi講：我同依位靚仔（瞟一眼Felix）都已經係會員，而其他人都無需要啦，唔該晒～

Yumi行開左之後，我地就繼續傾喝，比如傾下TT上個月去日本旅行既野，又傾下Michelle安排緊同男朋友結婚既野。

席間有講有笑，忽然一陣手機鈴聲響起，樂仔拿出電話，望著螢幕。

那一刻，大概看到不想看的來電者名字，樂仔皺一皺眉，表情十分為難。

「唔好意思，我要出去聽個電話……」跟住樂仔就行左出去。

我同樂仔只係同事，雖然十分欣賞佢，但彼此之間並無真正交流，所以佢到底有咩煩惱，我一概不知。

「咦，做咩今次d野食好似咁耐都未黎既？」隔左一陣，Felix忽然說。

比佢咁樣講一講，我都覺得好似係，咁啱瞄到遠處有位經理喺度，於是我揮一揮手，叫左佢過黎。

「唔該，我地落左order好耐啦，點解d野食重未到既？」

「哦，我幫你跟一跟吖。」

經理用手拉一拉衣領，側頭向繫在衣領的對講機低聲說：

廚房‧廿七號檯‧出貨未。

隔左一陣，聽到對講機既另一端話：

出左啦喎。

「放心啦，應該到架啦。」經理好有信心咁講，果然一講就到，兩位侍應已經將食物送左黎。

「哈哈，每次都係一催佢就黎架喎。」

「因為已經等左好耐先會催架嘛，所以催佢嗰陣已經差唔多架啦。」

「嘩，點解佢一係唔黎，一黎就好似黎晒咁既。」

「唔知佢喎……咦，樂仔咁耐重未返既？」

「可能個電話好重要掛。」

「洗唔洗傾咁耐呀，又釣到大客呀？」

「可能係私事呢。」

「哦……咁我地食住等啦。」

咁‧我‧地‧食‧住‧等‧啦——

當晚，樂仔再無出現過，打電話無人聽，whatsapp顯示為離線，無人知佢去左邊度，閉路電視亦都影唔到佢離開瓊華中心。

樂仔消失左。

(第一章完)

(第二章：警察問話)

「咦，樂仔今朝無返工既？」

「Happy Friday無端端走左去，打佢電話又唔聽，whatsapp又唔online……」

「樂仔今次搞咩呀，佢不留做野都好有交帶個喎。」

星期一早上，樂仔無返工，佢無請假，打電話無人聽，whatsapp既最後上線時間仍然維持喺上星期五既夜晚。

大家都擔心樂仔既安全，唔知佢會唔會出左咩事。

「你估……會唔會係比南亞人擄左去呢？」Michelle估估下咁話。

「唔會掛，又唔係深水埗……」我就唔係好同意。

「車～旺角咪就喺深水埗隔離囉！」

「嘩，乜你地咁好想像力既，」Felix走左過黎搭訕。「不如再誇d啦，話係比外星人擄走左！話唔定維港上空依家有部UFO飛緊，飛左過去大帽山嗰邊添呀！」

「我地依d唔係叫想像力，係叫推理能力，」Michelle駁番佢嘴。「你嗰d講UFO先至係想像力囉！」

此時郭Sir由房走左出黎，同Felix講：「今日樂仔無返，咁上星期樂仔簽成嗰個大客邊個跟呀？」

「哦～我有follow呀，」Felix說。「依個客咁出名，我都想見下佢，之前我都有買佢既股票，雖然蝕左少少……」

「下，你有買佢隻股架？我淨係幫襯過佢個網站乍。」

「無買佢隻股係好事，我之前買左，依家都未返到家鄉……」

眾人有講有笑，如常進行一天的工作，跟單既跟單，call客既call客。

一陣腳步聲。忽然有幾個人走左入黎，兩男一女。我認得行頭既女人，係General Admin既同事。

「你好，請問郭Sir喺度嗎？」女人說。

Michelle幫手叫左郭Sir出黎，女人繼續說：「依兩位係警察，話有d事想向郭Sir查詢……」

大家聽到警察二字，都十分驚訝，尤其係郭Sir聽到話要查自己，頓時嚇得有點失色。

但郭Sir畢竟係一個冷靜既人，而且應該係清者自清，所以好快就回復鎮定。

「兩位阿Sir，請問有咩事？」郭Sir問。

「你係咪羅永樂既上司？」

「係。」

「羅永樂既家人報左警，話佢由上星期五晚開始一直無返過屋企，嘗試用電話同手機軟件聯絡都無回覆，至今已經失聯超過四十八小時。」

警察續道。

「我地問過你地公司，知道羅永樂今朝都無返工。而根據我地既資料，佢最後出現嗰陣，好可能就係同同事上星期五晚食飯，請問當晚你有無出席？」

「有呀，我地在座幾位同事都有出席，總共五位。」

「咁我地要向閣下五位問一問話，希望你地合作協助調查，從中搵到有關羅永樂失蹤既線索。」

「咁不如我地入會議室傾好嗎？」

「好。」

我地進入會議室，分別在長方形檯的兩側坐好，而兩位警員則坐在主席位置，向我們問話。

「郭先生，你可唔可講下當晚食飯係點樣，同埋你地最後係喺咩情況之下見到羅永樂？」

「上星期五係我地Happy Friday既定期聚會，我地條team有七個人，出席既有六個，分別係我、阿樂仔、Felix、Karson、TT同埋Michelle。」

郭Sir續道。

「我地喺瓊華中心牛角食飯，跟住阿樂仔坐坐下，無端端就話要出去接個電話，於是就出左去，之後就無再返入黎，佢成餐飯都無食到。」

「佢出去嗰陣係幾點？」

「Sorry，我無咩印象。」

「係七點九之前既，」Felix插口道。「我地嗰晚book左六點九食飯，但d食物好耐都未黎，於是嗰一刻我望下隻錶，心諗：『成搭九個字都未到。』嗰陣樂仔已經離開左一段時間。」

「即係六點九至七點九之間？」

「七點至七點……七個字之間，係咁上下。」

「咁佢離開嗰陣有無咩異樣，或者有無提過係邊一個打比佢？」

沉默。

「我希望你地明白，任何細微既事項，都有機會成為我地重要既線索，所以如果你地留意到咩小事，都可以同我地講。」

在樂仔接電話那一刻，我瞥見他皺一皺眉，似乎十分心緒不靈，但我應唔應該向警察講？

我的答案是NO，因為這點根本無內容，不成線索，又或者可能只係我睇錯左。

「你地咁多位當中，邊位同羅永樂最close架？」

大家都無回應警察既問題。我地同樂仔份屬同事，但平日交談流於表面，雖然相處融洽，但其實無咩深交。

「樂仔加入左我地公司只有一年左右，我地份屬同事，但其實都未有咩深交，至少我自問無。」我帶頭回答警察的問題。

「咁其他人呢？」

眾人均搖搖頭。「我地都係一樣啦。」Felix說。

「咁你地有無嘗試聯絡羅永樂？」

「有，星期五嗰晚，同埋今朝都有。」郭Sir說。「Michelle，係咪你嘗試聯絡阿樂仔架？」

「係呀，」Michelle說。「我星期五晚打過比佢兩三次，今朝亦都打過比佢兩次，全部都無人聽，試過飛左去電話留言。」

「我星期五晚都打過一次，」Felix說。「另外，我地team人自己有一個Whatsapp群組，我地曾經在群組嘗試搵過樂仔，但佢無回覆。」

「你地係咪都係打佢既手提電話9773XXXX？」

「係呀。」Felix和Michelle異口齊聲地說。

「咁點解你地無再搵佢？」

「無話點解嗰喎……」Felix說。「搵唔到就係搵唔到架啦，又或者佢有緊要野做，咁你都無理由keep住打比人嗰喎。」

「咁其他人呢，有無繼續嘗試聯絡羅先生？」

眾人搖頭。

警察又問郭Sir有無其他方法可以聯絡羅永樂，郭Sir說不知道。

「依位先生有無野講？」

「無呀，阿Sir，我同羅永樂唔係好熟架乍。」TT耍晒手擰晒頭咁話。

「Okay，如果羅永樂有搵你地，或者你地諗到任何野，係可能幫助到我地搵番羅永樂既話，希望你地主動同警方聯絡。」

(第二章完)

(第三章：性騷擾)

今日星期五，就係咁，樂仔已經足足消失左一個禮拜。

由於時間拖耐左，但依然搵唔到樂仔，警察方面都開始緊張，發出尋人啟示，報章及網上媒體亦有相關報導。

而成件事最撲朔迷離既地方，係無論牛角餐廳定係瓊華中心既閉路電視，竟然都影唔到樂仔有離開過。

閉路電視既最後影象，係樂仔行入牛角外面既洗手間，之後就無再出過黎。

而洗手間，當然，出入口只有一個，係無第二條路可以行番出黎既。

我以前睇過一本小說，書名叫《那夜凌晨，我坐上了旺角開往大埔的紅VAN》，內容大概係講有人憑空消失，雖然結局與時空交錯無關，但多少令我聯想到，莫非樂仔係穿越時空隧道，去左另一個時間／空間？

隨便到討論區瀏覽，都會發現好多關於穿越時空既posts，例如外國有主婦只係出左去買餸，返到黎屋企，發現丈夫老死左，而原本重係小朋友既阿仔，已經長大成人，問阿媽：依廿年黎，你去左邊度呀？

我對世上萬事萬物，都抱持開放既態度，願意接受不同既可能性，例如世上真係有未來人，又或者我地個世界根本係Matrix，我地全部人都係比The Architect擺佈緊。

但如果廁所真係有一條時空隧道，咁會係點架呢，唔通係喺屎坑入面……忽然諗起伊藤潤二既漫畫《呻吟的排水管》，愈諗愈恐怖……

或者簡單d諗，可能係部閉路電視malfunction啫～

之但係，依家閉路電視係有影象，但影唔到個人喎……

況且，樂仔已經失蹤左成個禮拜，連佢屋企人同警方都搵佢唔到。

樂仔，你究竟去左邊？

我擔心樂仔既安危，但我有我既生活，而即使無左樂仔，我地條team亦可以正常運作，所以樂仔既消失，實際上，對我地影響有限。

當其時我係咁諗，之後我才發覺，事件遠比我想像中嚴重，所以我當時既想法，實在係太天真。

今日我地team人一齊食完午飯，如常回到office，有人選擇把握時間午睡片刻，而我就走左入pantry，睇下有咩野食，準備黃昏之前可以頂下肚。

忽然有人走左入黎，我眼尾瞄到對方既身影。

「咦，你又入黎搵野食嘅，Michelle，頭先食唔飽咩？」

Michelle有點猶豫地望著我，無回答我既問題。

「點呀，係咪有咩事？」

「Karson，發生左d野，我想問下你既意見……」

「講啦～」

「今朝早……」Michelle欲言又止。「郭Sir佢……佢摸我呀……」

「下！」我大為驚訝。「咩話！郭Sir摸你？」

Michelle點點頭。

「佢點摸你呀？」

今朝我入郭Sir房，擺低d文件，轉身諗住走嗰陣，佢叫停左我。

佢話：Michelle，你過黎吖。

我不疑有詐，就繞過張檯，行埋佢度。

過到去，佢上下咁打量我，無端端話：「Michelle，有無興趣一齊去泰國玩呀？」

我話：「Okay呀，泰國應該多野玩，幾個人一齊玩應該好正。」

跟住佢就話：「唔係幾個人，」佢笑笑口咁話：「係我同你啫。」

「下……」此刻我心知不妙，我睇到佢既目光好淫邪，於是我立即打退堂鼓。

「郭生，無咩野我都係出番去先啦。」

就喺我去開門嗰陣，我feel到後面有人一手摸落我pat pat度……我下意識叫左出黎，同時即刻擰轉身，我見到佢喺我前面，似笑非笑個樣充滿慾望……

嗰一刻我好驚，立即雙手交差抱在胸口前面。

「嗱，你唔好同人講呀，」佢用威脅既口吻話。「你唔同人講既話，我可以加你人工，我請埋你去旅行都得。」

我真係好驚，而且我覺得佢個樣好淫賤好樣衰，簡直令我作嘔，我完全唔想望到佢……

我慢慢向後退，直到我個身觸碰到個門柄，我個人就突然醒一醒，於是唔理三七廿一，立即開門出左間房。

出左房，我重未平伏到……Felix見我花容失色，問我咩事，但我好亂，我就話：唔知呀……之後我就衝左去toilet，整理一下自己既情緒……

「竟然發生d咁既事……」我又驚又怒地說。

「我好驚呀……Karson，你覺得我應該點做？」

「但郭Sir……佢不留都唔係咁……」我說到這裡嗄然止住，因為我唔想Michelle覺得我唔信任佢。

「你有無講比其他人知？」我轉而問Michelle。

「未呀……你係第一個。」

「不如咁啦……」我說。「其實都係第一次有d咁既事喺我身邊發生……現在無證無據，都做唔到d咩……」

「我都唔知呀……我唔想無左份工，我好中意喺依度做野……我就黎結婚啦，我同honey重要買樓架。」

「我諗，或者現階段可以保守d，但一定要好好防範……」

「點防範呀？」

「盡量減少入佢房囉，同埋避免有二人獨處既機會。」

「咁如果佢叫我入佢房呢？」

「扮病……戴口罩，要扮下咳，入佢房既話唔好關門，即入即出，話有病唔想傳染比佢。」

我說到這裡，內心暗忖：咁樣唔係長遠之策，唔通日日扮病咩……

我唯有提議：「或者你可以上網search下，睇下類似既情況，其他人會點處理……又或者去婦團個網站，睇下有無教人點做……」

「但最緊要保持鎮定。」我對Michelle承諾。「如果真係證實左有事發生，我唔會是非不分咁去護駕，我會support你。」

(第三章完)

(第四章：罪)

郭Sir竟然性騷擾Michelle？

我並唔係話Michelle缺乏吸引男人既魅力，而係我已經跟左郭Sir好多年，十分清楚佢既為人：佢有老婆仔女，待人接物向來都幾君子，唔會話下下中意佔人便宜。

定係……其實我跟本從來唔清楚郭Sir？

每個人都有佢既陰暗面，分別只係你識唔識得點樣去隱藏。以郭Sir既道行，要騙過我，其實唔難。

反正每個人日撚日都係戴住假面具返工。郭Sir係，Michelle都係，而我當然亦不例外。

又或者，其實係Michelle講大話呃我？

Michelle點解淨係搵我一個？佢無解釋。佢大可以搵Felix……再講，佢話當場有大叫一聲，咁唔通無人聽到架咩？

但如果佢係呃我既話，動機係咩？想搞單野出黎拉我落水？整瓜我對佢有咩好處？

Michelle經驗未夠，就算我走左，最多請個新既Assistant Sales Manager番黎，應該都唔會比到機會Michelle上位。

那天晚上，我在家左思右想，同時用部notebook上網搜尋資料，睇下可唔可以幫到Michelle。

「上網搵咩呀？」一把女聲傳來。穿著吊帶睡衣的Amy從後縷住我的脖子，個胸壓左落我個背脊度。

同多數港女一樣，Amy唔算大波，但屬於我中意既類型：腿長而身裁平均、中意打扮又唔會太濃妝、任性但不失醒目、中意買野但又儲到錢、西面得黎依然可愛。

試問咁樣既女友，可以去邊度搵？

我和Amy同居接近兩年，大家都滿意咁樣既生活，唔需要急住結婚，亦無計劃要生兒育女。

非常慶幸，我地雙方都無長輩壓力，可以兩口子搬出黎住，享受自由自在既二人世界。

「真係講你都唔信，」我說。「妳記唔記得邊個郭Sir？」

「記得呀，你阿head呀嘛。」

「你信唔信佢會性騷擾女下屬？」

「下，無話信唔信嗰喎。」她說。「做咩呀，佢比人告性騷擾咩？」

「唔係，但我地有一位女同事話比佢摸，依家單野重未浮上面。」

「你好似得一位女同事乍嘛。」

「係呀，Michelle囉。」

「咁佢摸Michelle邊度呀？」

「依度囉。」說著我頭也不回反手去拍Amy個pat pat。她輕輕地「呀」一聲。

「BB，你頭先唔係好專心搵緊資料架咩……」她說著稍為直起身，雙手搭在我的肩上，對波由我既背脊移到我的頸上。

「係呀，」我說。「不過妳做依行，應該都有好多性騷擾啦。」

「下，」她直起身，對波移到我的耳際上方。「BB，你又提……」

「咁其實除左報比上司聽，係咪無其他野可以做架？」

她好像不太想回答，但她還是說：「咪講過囉，除非好嚴重，如果唔係公司唔會搞，所以都係自己小心d。」

Amy之前同我提過性騷擾既事，佢話有d客好仆街，會借d咦hi埋黎。

雖然係好廢，不過現實就係咁，唯有避得就避，避唔到就可能只得硬食，始終出黎打份工，可以點？

雖然我未試過比人性騷擾，但「西客」我見得多，所以返工真係要醒目d，最重要係識得保護自己。

到左星期一，我諗住將搵到既少少資料分享比Michelle，點知佢竟然無返。

同樂仔一樣，佢無請假，打電話亦無人聽。

受樂仔失蹤既陰霾籠罩，我地都十分擔心Michelle既安危，唔知佢會唔會好似樂仔咁……出左事。

不過此刻都做唔到d咩，由於失聯尚未超過四十八小時，就算報警，警察都應該唔會受理。

就咁過左一日，我收工從office離開，突然收到Michelle既電話。

「Michelle？」我說。「咩事呀？你去左邊呀？」

「Karson……我……」她一邊低聲嗚咽一邊說。我知道發生左事。唔通係郭Sir去左搞Michelle？

「Michelle，你冷靜d，話比我聽發生咩事，我應承過，我會support你！」

「我……」Michelle嗚咽著說。「我諗……我應該知道樂仔去左邊啦。」

下？樂仔？唔係郭Sir咩？

「樂仔？」我真心聽到一舊雲。「唔係郭Sir搞你咩？」

「Karson……我地做錯左……樂仔佢……」

「Karson……我同你……我地有罪……」

突然話機另一端傳來一把男聲，但聲音很混亂，聽不清楚說些什麼。

只聽到Michelle話：唔好呀！唔好呀！然後一下沉重的「咚」一聲，手機應該跌在地上，繼而傳來了Michelle的尖叫聲。

(第四章完)

(第五章：傳說中的大客)

Michelle死左。死因係後腦被硬物重擊。

兇器係一個15KG啞鈴。兇案現場，係Michelle男朋友屋企。

還押中既疑兇，係同Michelle計劃緊結婚既男朋友。

據知被捕一刻，佢仍然好激動，不斷高聲大罵：「八婆！比綠帽我戴！」

作為與Michelle最後通電的人，我被警察傳召問話。由於我部電話裝有錄音apps，我就將當日既對話，原原本本咁播比警察聽。

「梁家俊先生，請問你同死者係咩關係？」

「同事。」我簡單回答。

「請問死者當日點解打比你？」

「你咪聽左段錄音囉……」我有點不耐煩。「Michelle好似發現左d野，想同我講……」

我忽然察覺到警員以一種古怪的眼光望著我，那種目光充滿侃意，同時對方的嘴角微微上揚，似笑非笑……

莫非……佢懷疑我就係「比綠帽疑兇戴」既人，懷疑我係Michelle既情夫？

我想同個差佬講，雖然我都唔知Michelle話我地有「罪」係咩意思，但肯定唔係指姦情，因為根本無咁既事！

但我心念一動：Michelle既男朋友當場斷正，已經落網。而我作為最後與Michelle聯絡既人，只係循例問話。

咁其實個差佬點諗我，根本無咩所謂，反而如果我講多左，可能會重煩。

落完口供，我仍然有點耿耿於懷。如果Michelle真係有第三者既話，會唔會係郭Sir？

無理由，Michelle話佢對郭Sir好反感，況且佢嗰日講完，第二日就已經派綠帽兼且比男朋友捉到，有無咁快呀？

又唔通個第三者係樂仔？

Michelle打比我嗰陣，話知道樂仔去左邊度，係咪即係樂仔搵過佢黎？

假設樂仔唔係失蹤，而係著左草，依家打電話返黎，淨係搵Michelle一個，咁佢地兩個既關係可能非比尋常……

但Michelle話「我地有罪」，到底係咩意思？

罪係一個好嚴重既term，唔會係指一般犯錯，要係犯左法，又或者涉及道德和宗教層面，先至會講有罪。

如果我犯左法，差佬自然會做野，所以應該唔關事……而我本身無宗教信仰，亦唔覺得Michelle係一位狂熱教徒，會以自己既宗教價值觀，粗暴咁去審判其他人……

咁剩低既可能性，就只有道德層面……唔通Michelle有妄想症，以為我同佢有私情？……但如果係咁既話，成單野又關樂仔咩事？

短短十日，我地條team失去左兩個人，一位失蹤，一位被殺，所以成個office既氣氛變得好沉重，根本做唔到野。

到底我地條team係咪中左魔咒？如果係既話，下一個中招既人……會唔會係自己？

我坐喺自己個位度，此時有人輕輕吹住口哨經過，我抬頭一望，原來係郭Sir。

「Karson，今日Felix請假，咁下奏同個客既appointment你去啦喎。」

「Okay，我記得呀。」

「重有，我下個星期去泰國玩，依度你同Felix頂住啦喎。」

「完全無問題，郭Sir你玩得開心d啦！」

之後郭Sir又繼續吹住口哨，步履輕盈咁行左入房。

我不禁心想：團隊最近無左兩個人，點解郭Sir咁冷血，好似完全無感覺咁既？

我一向認識既郭Sir，係充滿熱誠和幹勁，而且十分照顧下屬。

但最近郭Sir好似完全變左另一個人，好似樣樣野都唔關佢事……

依家有人死左，佢重好似好happy咁！

我按照schedule下午來到中環見個大客，這位大客之前係由樂仔搵返黎，之後由Felix接手，今日就由我去見。

由於這位大客在社會上頗有知名度，因此唔方便在此公開他的名字，我姑且稱佢為「W商人」。

我來到W商人的辦公室，與他握手，並解釋因為Felix無返，唔好意思，今日既appointment由我來負責。

我以往經常在報章雜誌看到W商人的照片，今日得見真人，覺得佢比傳聞中更友善，待人無咩架子。

我地好快就入正題，傾返project既野。我發覺W商人既轉數好高，好彩我準備充足，對於佢提出既問題，我都能夠一一解答。

「好野，答得幾好吖，」W商人表示讚賞。「份proposal我好滿意，你地可以跟返program去做，我地會喺phase two派人黎support你。」

「多謝你呀W先生，我地一定會盡力去做，保證令你滿意。」

我說著從自己的西裝口袋拿出一支鋼筆，連同文件遞給W商人。

「W先生，唔該你喺文件上簽個名，咁我地就可以展開phase one，進度方面保證會on schedule既。」

W商人簽左名，我今日既任務完成。但係佢遞返支筆比我嗰陣，神色一變，好似諗到d野咁。

「Karson，你地之前係咪有位比較後生既同事，好似叫……阿Lok下話？」

「係呀。」

「點解佢無黎既？」

「佢……佢無做啦。」

「哦～之前Felix話佢有事……」他說。「咁佢依家無做啦下話？」

「係呀。」我說。

W商人好像有點猶豫，但佢好快就決定講落去：「上次我見阿Lok，嗰日又係要簽份文件，咁佢又係遞左支筆比我，咁我簽完名之後，支筆佢唔記得拎返。」

「哦～無問題吖，W先生，如果我見到阿Lok，我會同佢講架啦。」

「唔係，」他認真說。「你聽我講，支筆我重keep住左喺度，你可以睇下先。」說著在下方的抽屜找了一會，拿出那支筆遞給我。

「你覺得依支筆有無咩特別呀？」他問。

我看來看去，依支都只係一支普通既鋼筆，不過係比較墜手左少少。

「Sorry，我唔係好熟鋼筆既牌子同款式，所以答唔到你既問題……」

「唔係，」他再次斬釘截鐵地說。「你覺唔覺得，依支筆好重？」

「覺呀。」我點頭說。

「我當時都唔為意，但因為阿Lok漏左喺度，所以我再睇番既時候，發覺，我好似從來都未用過咁重既筆。」

W商人續道。

「唔好意思，我份人向來有一股強烈既好奇心，所以我拆開左支筆，睇下入面有d咩，點解可以令到支筆咁重。結果，我有驚人發現。」

他說著將鋼筆從中間擰開，我大吃一驚，鋼筆內部既結構非常複雜，只有精密既儀器先會有咁複雜既結構。

「你可以睇到，依度有個好細既掣，」他說著將手指放準在掣上。「只要用左依個掣，依支筆既用途就會完全唔同左。」

他輕輕用力，啪動左個掣，然後將支筆擰返好，再用筆頂的尖端對準牆壁，手指在筆身上輕輕一擦，只聽得「咻」一聲，有什麼從筆頂直射到牆壁上。

我當場呆左。我係咪睇緊《占士邦零零七》既電影？

「正如你所見，依支唔係一支普通既筆。」W商人說。「只要開動左個掣，佢就可以成為一支槍。」

「點解……點解會有支咁既野架？」

「我唔知，」他說。「不過一件咁精密、以高超科技製造而成既隱藏式工具，我諗，應該只有特務先會用到。」

我心中一震：特務？

「如果你有留意到，依支筆槍既發射口係喺筆頂。照我估計，使用者通常係遞支筆比人既時候，趁對方唔為意，開槍偷襲對方既。」

「咁樣……」我稍為定神，立即諗到，一定要同依樣野劃清界線：「我唔知依樣野係咩黎，sorry，我同我地公司，同依樣野完全無關。」

「唔洗講sorry～」沒想到，W商人竟然撥一撥手，輕鬆地說。「依家又無發生咩事。照我睇，依支筆唔係用黎襲擊我，因為如果係既話，我應該已經瀨左野。」

「咁樣，W先生……」我說。「我都唔知點解樂仔會有支咁既野……如果你覺得有需要既話，請你選擇報警，保障番你既人生安全。」

「唔洗報警～」W商人又再撥一撥手，笑笑口地說。「我都講左啦，依家又無發生咩事。」

他想了一想，問：「Karson，其實你知唔知阿Lok係一個咩人黎架？」

「我唔知呀……阿Lok係我地既新人，做左一年左右，最近消失左……」

「消失左？」他說。「比你地公司炒左呀？」

「唔係，佢係真係消失左……」於是我用iPhone上網找到相關報導，展示比W商人睇，並向他講述閉路電視影唔到樂仔離開。

「嘩，乜整單咁既野呀……」

「我地都唔知點解阿Lok會消失，」我說。「單野已經發生左接近兩個禮拜，而我地隊team運作正常，完全無受影響。」

「我知～」W商人說。「咁你覺得點解佢會消失左吖？」

「我真係唔知……」我想了一想，試著說。「但既然佢有件咁既裝置，咁可能……佢真係一個特務掛……」

我的視線向下移，沒有直望對方的眼睛，而且講得愈來愈細聲……

無計，因為我對自己講既野都無信心，唔通樂仔真係一個特務咩？依家拍緊戲呀？

雖然我無望W商人，但我feel到佢一直都望住我。

然後我聽到佢發出「摺」一聲，跟住佢話：「幫我拎返牆上面支野過黎吖。」

我依言照做，行到埋牆，先發覺原來支筆槍發射出黎既「子彈」，其實係一支針。

「放心拔出黎啦，無毒架，」他說。「應該無毒架。」

我有點不安，但既然個客話無毒，咁我無理由拎張紙巾出黎包住佢。

於是我在針尾著力，拔左支針出黎，遞給W商人。

「唔洗咁驚喎Karson，你諗下啦，就算支針有毒，正常都係喺個頭度，唔會預成支針入晒落肌膚裡面既。」

我心想有理，而今次好明顯唔係W商人第一次「試射」，既然佢試過，即係大概知道支針係咩料。

「一支咁既針，作為子彈用途，正路都應該係上面帶毒架啦。」我說。

「係吖。」他點頭說。

「咁請問上面有咩毒？」

「麻醉藥囉。」

Oh I see，原來係麻醉藥。

「照我睇，依件事可能好嚴重……W先生，我真係建議你報警……」

「照咩你睇啫，我都話唔洗報警囉。」他說。「你話照你睇……咁你覺得有需要，你可以報警架，你咪報警囉～」

對方講到咁，即係根本唔想我報警，但原因係咩？我真係唔係好明。

W商人好似睇穿我諗d咩，忽視雙手拍在檯上，傾前身，瞪大對眼咁話：「乜你唔覺得成單野好得意架咩？」

下？……

「喂，咁啦，我地今日就傾住咁多先。依支筆，雖然唔係我既，但亦都唔方便交比你，既來之則安之，就擺住喺我度先啦，」

W商人最後說。

「如果你見到阿Lok，記得千其唔好同佢講支筆既野。重有，你以後見到佢，可能你需要小心d。」

(第五章完)

(第六章：暫時放開懷抱)

My name is Bond,
身穿英國晚禮服的樂仔展示出充滿魅力的微笑，好有型咁介紹自己：
James Bond.

我唯一有印象睇過既《零零七》電影，係二零一二年由丹尼爾‧克雷格主演既《Skyfall》。

但即使係丹尼爾‧克雷格所擁有既裝備，都只不過係手槍同埋微型無線電通訊器，然而樂仔表面上平平無奇，原來一直都帶住一支高科技筆型麻醉槍……

唔通大學Fresh Grad只係樂仔既表面身份，真正既樂仔，其實係中國政府派駐香港既特務？

無幾耐之前，我哋成team人重係好開心咁享受Happy Friday，點知過左都無一個月，又有人消失、又罪、又有人死、又特務……

到底我係咪活在一個Matrix裏面，咁啱個程式short左，搞到我近期既生活受到咁大衝擊？

我決定暫時放開懷抱，今日同Amy一齊出去散下心。

我地喺朗豪坊UA睇完戲之後周圍搵野食，Amy話想食牛角，我心諗：唔係掛……

「不如食千両啦。」

「你唔係中意食牛角咩，你之前話做左會員吖嘛。」

「總之今期唔係好想食……」

「咁去食牛涮鍋囉，」Amy說。「我記得你話過Kabu Pass會員有折咋。」

「不如近近地食Beerliner啦。」

「我無所謂呀。」她說。

我哋喺Beerliner食飯，叫左例牌既德國豬手、雜腸拼盤同埋pizza。

「BB，咁你依家隊team有無問題呀？」

「無啦，其實最緊要Felix同我啫，再加個Jason或者TT就可以頂得住。」

「Jason唔係話諗住走咩？」

「條友前排想考政府工，但依家都無晒聲氣啦，我估考唔到掛，」我一邊切腸一邊說。「嘩，咁你都記得Jason想走既？」

「下，我記得呀。」

「黎緊郭Sir又話要去泰國旅行，其實佢依家都唔會點理野，好多野都扔晒畀我地做。」

「BB，不如我哋都搵時間去泰國玩下囉。」

「好呀，你想去泰國邊度吖？」

「你話事啦。」

「布吉好唔好？都係去hea番幾日啫。」

「好吖BB，我就係想去布吉啦。」

「但最快都要下個月先，」我說。「因為唔可以要Felix一個咩起晒d野，我要同佢夾一夾時間。」

我哋食完飯行左出朗豪坊。我同Amy第一次kiss既地方，就係喺朗豪坊門口對出既雕塑附近。

雖然成條街都係人，但我哋有時行過，都會停低kiss下，可能我地就係中意喺人潮之中kiss既感覺。

（震動）

「唔好理佢啦！」

「可能係W商人。」

我同Amy在街上接吻到咁上下，突破收到來電，一睇，原來係一個不明來歷既電話號碼。

「屌！邊撚個呀？」我罵了一句，然後接下接聽鍵。

「喂？」對方說。「你好，請問係咪梁先生呀？」

「係呀，咩事呀？」

「梁先生，你好呀，我係瓊華中心牛角既經理。」

下？我心中打了個突。

「你哋上個月咪黎過我哋度食野既，咁嗰日……你哋其中一位失左蹤。」

對方續道。

「其實關於依單野，我有d事想搵你講下，或者你方唔方便，可以搵個時間上黎我哋餐廳傾兩句？」

(第六章完)

(第七章：牛角會議)

「你好，我叫Simon，係瓊華中心牛角既經理。」眼前一位高高瘦瘦、說話帶磁性的中年男子說。「喺我身邊依位叫Yumi，係我地餐廳既waitress。」

坐在他身旁的妙齡少女面帶微笑，以水汪汪的眼睛望著我。

我們坐在瓊華中心牛角的一組靠窗座位。因為現在係落場時間，整間餐廳只有我地幾個，室內熄左起碼一半既燈，靜得有少少恐怖。

「唔知你有無印象，」Simon說。「當日你蒞臨牛角，主要就係我地兩個serve你地嗰檯既。」

「我記得，好似係我問你d野食到未架嘛？」

「係，」他說。「關於你朋友失蹤既事，因為我地有d資料，而我check返個訂檯紀錄，搵到你個電話，所以就約左你出黎傾一傾。」

「好吖，請問係咩資料呢？」

「首先講明，以下我將要講既野，可能會引起閣下不安，所以希望你有個心理準備先。」

「Okay無問題，你講啦。」

Simon吞了吞口水，開始說：

「你可能都知道，我地牛角餐廳係有一間總公司，叫做株式會社，簡稱Kabu。包括本餐廳，同埋近年流行既牛涮鍋，都係由Kabu從日本引入香港。」

「Kabu係香港公司，但其實頂上老細係一個日本人，叫山本先生。」

「日本當地既牛角同埋牛涮鍋，重有好多其他食肆，都係由山本先生直接控制既母公司經營，我姑且稱依間母公司做Kabu Japan。」

「Kabu Japan係日本飲食界首屈一指既大企業，規模龐大，擁有自己既禽畜農場、中央屠房同埋食物加工場。」

我聽到這裡，愈來愈覺得奇怪，因為樂仔失蹤既事，似乎同Simon講緊既野無咩關係。

但我知道Simon只係啱啱開始講，可能重未帶出重點，所以我決定唔出聲，繼續耐心聽落去。

Simon續道：「Kabu Japan一直喺日本經營得非常好，有望躍升為飲食界既超級龍頭公司。」

「可惜，正當山本先生既事業如日方中之際，Kabu Japan爆出左一單醜聞。」

「約莫兩年前，有日本研究機構對Kabu Japan既牛肉進行化驗，結果相當負面，」

「研究人員發現，牛肉既內部已經開始腐爛，但由於經過獨特既加工處理，外表睇落同正常無異，甚至連食落既口感，都同新鮮牛肉差唔多。」

「我好似記得睇過類似既報導，」我努力回想。「嗰陣報紙有賣過，facebook都好似有人share過，但我唔知原來係同牛角有關。」

「係，當時香港媒體係有報導過，」Simon續道。

「但其實媒體所報導既野，根本就唔係事實既真相。」

「Kabu Japan運用左佢地龐大既影響力，隱藏左嗰次研究既真正化驗結果，所謂肉質腐爛，只不過係用黎應付社會輿論，」

「嗰次研究真正發現到既野，比起肉質腐爛，係遠遠嚴重得多，所以Kabu Japan寧願發佈肉質腐爛既消息，都絕對唔可以比真相曝光。」

此時他輕輕吸了口氣，說：

「其實嗰次實驗，係發現到Kabu Japan既牛肉，竟然含有人類細胞。」

「含有人類細胞？」我心中一遍疑惑。「我唔係好明你想講d咩，你係想話，佢地殺左人，然後將人肉混落牛肉度？」

「唔係，」他說。「所謂含有人類細胞，並唔係俱俱牛肉溝埋人肉咁簡單。」

「化驗結果顯示，牛同人兩者既細胞，在Kabu Japan既牛肉之中，能夠完美互相融合，」

「換句話講，Kabu Japan既所謂牛肉，根本就唔係普通牛肉，而係屬於當今生物學界從未發現過，一種由牛同人既細胞結合而成既生物。」

「不如我單刀直入啦，」我打斷了Simon的話。

「你係咪想講，Kabu Japan表面係一間飲食公司，其實暗地裡進行生化實驗，企圖用DNA工程之類既野，創造一種全新既生物出黎？」

「無錯，正是如此。」他說。

「你有咩證據？」

「證據就係，上述所講既一切，都係我親眼所見，親耳所聞。」

Simon說著從身邊的公文袋拿出一疊相片，放在檯上。

「依度就係Kabu Japan既集合式農場。」他逐張照片解說。「而依棟建築物內部，就係Kabu Japan既中央屠宰場。」

「接住落黎依張相，你可能會覺得好恐怖，所以希望你有心理準備。」

看到Simon神色凝重，似乎唔係講笑，不其然令我緊張起來。我定了定神，向他點頭示意okay。

「依一張相，就係我所講既合成生物。」

此時我看到Simon手中的相片，禁不住倒抽了一口氣。

這是什麼！？

照片中央是一頭生物，從形狀看來，明顯是一頭牛。

這一頭「牛」，有著正常的軀幹和四肢。如果你從「牠」的後腿開始望，可以看到正常的蹄部和尾巴，然後向前移，是正常的前腿和脖子。

可是，當你再向前望，便是令人毛骨悚然的影像。

這頭「牛」的脖子所連接著的，並非一般的牛頭，而是一個人頭！

說是人頭，其實有點誇張，因為這個頭部沒有人類的頭髮，耳朵亦是一雙牛耳，但從臉部看來，卻明顯擁有人類五官的輪廓。

「你見到既依種生物，擁有人類既頭部、牛隻既身軀，」Simon說。「依種生物有一個暫稱，叫做mancow，係用牛隻作為藍本，再注入人類基因改造而成既。」

我感到既驚訝又奇怪：無幾耐之前，我見到W商人手中既筆形麻醉槍，以為自己睇緊《占士邦零零七》，而現在我又似睇緊邊齣戲呢……會唔會係法國電影《人工進化》？

「依隻野，係咪淨係得相？」我問。「你有無拍埋片？」

「無，」Simon說。「我係千辛萬苦先影到依張相，其實嗰次差d連影相既機會都無，更何況係拍片。」

我心中半信半疑：片又無拍，淨係得張咁既相，到底可信程度有幾高呢？

「關於Kabu Japan既實驗，或者我暫時講到依度先，」Simon說。「接住落黎，我會講返你關心既野，亦即係你朋友失蹤既事。」

「其實類似你朋友咁樣神秘失蹤既事件，並唔係第一次發生。」他續道。

「之前喺日本，都發生過幾單極為類似既個案，而且地點全部都係Kabu Japan旗下餐廳附近既場所。」

「咁即係點？」我說。「你係想話……其實我朋友係畀人捉左？」

「唔知，現階段重未有明確答案。」

「咁你估計呢？」我說。「你既然將我朋友單野同Kabu Japan扯上關係，即係話……你懷疑我朋友……比Kabu Japan捉左去做實驗？」

「關於依一點，我無從揣測，」他說。「但從各種證據睇黎，你朋友既失蹤，都幾肯定係同Kabu有關。」

我心中不禁涼了一下。雖然我跟樂仔說不上是什麼好朋友，但如果佢變成相片中既嗰隻野咁……我真係覺得好恐怖……

「不過我個人認為，包括你朋友在內既失蹤人士，畀Kabu Japan捉左去做實驗既可能性其實唔高。」Simon續道。

「好簡單，假設你想捉人，會唔會次次都喺自己地頭附近捉人咁戇鳩？」

「再講，以Kabu Japan既能力，要搵到活人去做實驗，其實唔難，根本無需要特登去捉人。」

我認同Simon的想法。

「其實我同你講咁多野，個concern唔單止在於失左蹤既人，亦都在於未失蹤既人，即係同閣下都有關係。」Simon續道。

「因為根據我地既資料，喺失蹤者消失之後既一段時間內，佢身邊既人，唔知點解都會逐一遇害。」

「依d人的死因各異，但絕少係自然死亡，死因多數都係他殺。」

我聽到這裡，全然摸不著頭腦：究竟一個人失蹤，點可能會影響到佢身邊既人逐一被殺？

「你係想講，失蹤者身邊既人會畀人尋仇，所以逐一被殺？」我說。

「我都唔肯定，但睇返資料，就唔似係。」他說。「因為喺相關既謀殺案當中，殺人者既身份都好廣泛，有死者既男女朋友、親戚、同事、鄰居，甚至連碰巧路過既薄餅速遞員都有。」

「我諗你都覺得好奇怪，有人失左蹤，同佢身邊既人被殺有咩關係？」Simon續道。

「但請你相信我，根據我地既統計，依個pattern係千真萬確，喺我地調查過既個案入面，全部都有發生過。」

此刻我的思緒萬分混亂，在千頭萬緒之中，我忽然想到Michelle，她不正是最近被男朋友殺死嗎？

「你講調查……而且你擁有咁多資料，你都唔係一個普通既牛角經理咁簡單……」我說。「咁你既真正身份到底係咩人？」

「我地今日同你會面，主要係講返Kabu Japan同埋mancow既野，重有失蹤者身邊既人會逐一遇害既事，」Simon說。

「至於我同Yumi既真正身份，唔好意思，我地暫時不便透露，因為我地有更重要既事要處理，請你諒解。」

「事實上，今日同你既會面，係完全超出左我地原本既計劃。」

「無論如何，今日同你講既野，希望你可以保密，暫時唔好同其他人講，但你最好自己小心d，因為我頭先講過既pattern，之前每單case都發生過，從來未試過有例外。」

(第七章完)

有無巴打覆下我呀

有無巴打覆下我呀

有無巴打覆下我呀

可以繼續

有無巴打覆下我呀

可以繼續

你係第一個應我既人，多謝你

(第八章：開始失序了)

楳圖一雄的恐怖慢畫《十四歲》講述未來世界成功以化學物質合成雞肉，繞過傳統飼養雞隻的步驟。

然而，這些由人類創造、應該沒有生命的「雞肉」，其中有一塊竟然偷偷長出眼睛，繼而長出心臟和四肢，最後長成一隻半人半雞的怪物，名稱叫Chicken George。

Chicken George擁有高超的智力，於短時間內已習得所有人類知識。

一次，Chicken George走進未來世界的動物園，嚇然發現那些經基因改造而成的生物，有著人類的頭顱、狗隻的身軀。這些生物通過玻璃看著Chicken Goerge，一直在哭泣……

「可怕既人類……係萬惡之源！」Chicken George心想。「我一定要滅絕人類，拯救動物，創造出一個新世界！」

眼前的畫面忽視換成牛角餐廳。

「你最好自己小心d。」Simon說。「因為失蹤者身邊既人都會逐一死去。」

「你有罪。」坐在旁邊的Michelle對我說。

「依支並唔係一支普通既筆，應該只有特務先會用到。」W商人說。

遠處，一隻mancow望著我，默默地哭泣。

那隻mancow……不對，牠的樣子變了……

那個樣子不是別人……正是樂仔！

我嚇然醒來。

原來係發夢……

我從床上坐起來，四周漆黑一片。看看鐘：現在是凌晨四時五十分。

我轉頭去望睡在身邊的Amy，雖然在微弱的燈光下看不清她的臉，但從她呼吸的節奏，我知道她睡得很熟。

我起床去喝杯水，然後一邊拿著手機，一邊吃著一塊消化餅。

今個月實在發生左太多事……太亂了，我需要靜落黎，好好整理一下。

首先第一單，係樂仔失蹤。

點解佢會無端端消失左？重要連閉路電視都影唔到佢離開……

跟住第二單，係Michelle被殺。

雖然話兇手係Michelle既男朋友，成單野好似同我無關，但Michelle臨死前打電話比我，無程程話知道樂仔去左邊，跟住又話我有罪，到底係咩意思？

然後第三單，係W商人既筆槍。

如果正如W商人所猜測，樂仔真係一個特務，咁佢既神秘失蹤就比較可以理解，可能佢有任務要執行，而憑藉特務既訓練，有本事避過閉路電視既監察都唔出奇。

最後第四單，亦都係當中最離奇既一單，就係牛角經理Simon同我講既野。

Simon所講既合成生物mancow，到底係堅定流？

從一般人既角度睇，一定會90%判斷佢係流既。而思想稍微開放既人，大概會覺得佢八成係假。

至於我，向來樂於接受各種新事物既可能性，所以我個尺度再大膽d，基本上覺得佢三成係堅，七成係流。

講真，如果係流既話，Simon呃我既動機係咩？

我地做sales既，行業中有部份害人之馬，有時會講大話昆客，動機當然係求財。

咁如果Simon講既係大話，動機係咩？佢並無sell我入會或者購買任何產品，甚至剛剛相反，佢講既野，絕對會令我以後謝絕食牛角……

Simon講說話既態度同埋邏輯性，增加左我對佢既信任度。至於張相……其實無咩意思，因為以現今既科技，要key個人頭上隻牛度，係好容易既事。

我用手指掃著智能電話的螢幕，打開Kabu Pass的官方app，狀態是登入，頁面上顯示著我的會員資料，還有我近幾次幫襯Kabu的紀錄。

我轉入Kabu的「關於我們」頁面，看到一些公式的介紹：株式会社於2008年成立，旗下經營多個日本品牌，包括Shabu Shabu專門店「牛涮鍋」、日本燒肉專門店「牛角」……

我關掉Kabu app，轉用Safari進入日本牛角的官網，再用翻譯功能將日文轉為英文，但作用有限，因為很多文字都是以圖片型式列出，翻譯功能當然譯唔到圖片。

我將畫面拉到網站最底的side menu，發覺當中有food introduction、store search、reservation、feedback，就是沒有about us。

我看到網站右邊有些類似聯盟餐廳的資料，我進入其中一個連結，再copy那所餐廳的名稱，在Safari上同時搜尋牛角和這所餐廳，結果竟然去了一個台灣網站。

這個台灣網站寫著「公司簡介：XXX於1973年創立，為日本首屈一指的餐飲企業，旗下品牌眾多，包括日本燒肉專門店『牛角』、日本涮涮鍋專門店『牛涮鍋』……」

我諗Simon所講既Kabu Japan，就係指依間公司。

坦白講，我對日本企業界無咩認識，所以依間公司個名，恕我真係未聽過，但觀乎「公司簡介」提到既系列餐廳同埋全球分店數量，都可以知道依間公司既規模非常龐大。

我在Safari搜尋這間公司的名稱，順利進入這間公司的官網，是一個英文網站，good！

我進入Corporate Profile頁面，想看看Chairman是不是姓山本，但卻找不到管理層的資料，只找到餐廳和員工總數，另外又睇到發展資料，知道依間公司早期改過幾次名。

我決定暫時放棄，bookmark了這個網站，然後關掉Safari。