一場公司飯局，我們的命運從此改寫

1001 回覆

228 Like 8 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

Elevens 2017-07-31 15:36:51

(第十一章：河畔夜話)

那年那月那日，我遇上那個令我心動的女孩。

她不算特別漂亮，但她的五官輪廓就是我喜歡的類型。她沒有港姐冠軍的智慧，但她任性得黎知分寸既性格，總是令我著迷。

我們擁有一些共同的興趣，抱持相近的價值觀。在床上，我們如魚得水，亦不時作出一些新嘗試。

「妳知唔知咩叫猿轡？」當晚，我們做愛後躺在床上，我問她。

「咩黎架？」

「猿轡即係日文既口塞，」我解釋。「即係一個球狀物，中間有好多窿，可以畀人抖氣既。」

「兩邊有條帶，綁喺個頭後面，」我說。「咁理論上戴左猿轡既人，可以抖到氣，但就講唔到野。」

「下，」她說。「咁要黎做咩架？」

「有d人鍾意玩囉。」

「你鍾意呀？」

「唔係。」

「你鍾意咪買囉。」她說。「有無圖睇下？」

我用iPhone搜尋了相關圖片給她看。「好吖，買啦。」她說。

既然Amy同意，咁買黎玩下都無妨。我轉而進入一個之前幫襯過既成人用品網店，好快就搵到件貨，但最終無落到order。

「我聽晚放工出尖沙咀買啦。」

「你唔係鍾意網購架咩？」

「費事等。」我說著關上螢幕，放下手機。

我起床走到窗邊，看著外面潮漲的河水。很多人沿著河邊散步，偶爾有跑手或單車經過。

TT涉嫌偷拍裙底，Felix應該依兩日內會報警，但其實咁又點？如果我地三個都就快死，咁報唔報警又有咩分別？

根據Yumi既統計，我地三個大概最多只有半個月命。Simon叫我設法找出樂仔，但一個連警方都搵唔到既人，試問我又可以去邊度搵？

「BB，你做咩著褲呀？」

「無，」我有點意志消沉地說。「突然想落街行下啫。」

「下……你做咩呀。」

「好耐以前我都係咁行，」我說。「純粹想出去散下心，好快返黎。」

「痴線，你唔好癲啦……」她說。「你係咪想依家去買個口塞呀？」

「唔係……」

「如果你一定要落去既話，咁我同你一齊去啦。」

Elevens 2017-07-31 15:37:27

於是我地著好衫，穿上人字拖，一齊落樓下既河畔區散步。

「以前都無咁多人，」在路上三番四次要避開途人後，我不禁說。「依家真係多人到不得了。」

從前既河畔區只有一間酒店，而且長年都無咩人住。如今舊有的酒店keep住爆之餘，附近重起左一間新酒店。

「BB，你今晚係咪有咩心事呀？」

「下……唔係吖。」

「BB，你講大話好廢呀。」

「我真係無野諗，」我說。「只不過近排公司少左人，做野做到好煩，所以想落黎散下心。」

「咁點解你無端端想玩口塞呢？」

於是我將充氣娃娃既野講畀Amy聽，但就無提偷拍既事，始終Felix重未報警，我唔想單野咁快曝光住。

「佢將同一個公仔換唔同既衫？」

「應該係，」我說。「照我睇應該係同一個公仔黎。」

「咁佢都幾專一吖，」她說。「可能佢真係鍾意個公仔呢。」

「緊係專一啦，成五皮幾野一個，想包多個公仔做二奶都唔易……」

我倆一直沿河散步，愈行愈遠，終於來到了較少人的地方。

這裡有兩道橋並列著橫過河面，彼此相距大約十米。其中一道橋好像是通往什麼政府建築物，閘門長期關上。

附近沒什麼住宅，只有一些跑手和單車偶爾經過。有人在橋上釣魚，也有人在喝啤酒。

「我地行左好遠啦，」她說。「最衰無著波鞋啦，如果唔係可以跑下。」

我們走到橋中間，眺望著河畔區兩岸燈火拱照水面的景色。晚風輕送，潮漲的河水在腳底下靜靜流動。一時之間，我倆陶醉在夜色之中，默默無語。

「BB，不如我問下你吖。」她忽然說。「其實你鍾意我d咩呀？」

「所有野，」我說。「妳個樣，妳個身形，妳既性格。」

「乜我有咁好咩？」

「有，」我說。「You are my perfect woman。」

我們在橋上相擁接吻。我忽然想起巴黎的戀人橋，橋上有很多情侶鎖，鎖上刻有情侶雙方的名字。

「BB，我唔鍾意你咁多野諗，」她說。「你唔好諗咁多野啦，好無？」

我一時之間唔知點答。

「BB……」她說。「到底最近發生咩事呀？」

頃刻間，我只想將樂仔失蹤以來所發生的一切來龍去眽，完完整整地向Amy和盤托出，但到最後關頭，我還是剎停了這股衝動。

依單野雖然不可思議，但講出黎既話，我諗Amy都會相信我，不過又有咩用？到頭來，如果搵唔到樂仔，或者我既結局都只有死路一條。

與其係咁，既然講出黎都無補於事，咁我寧願選擇開開心心，同Amy一齊渡過餘下既時光。

Elevens 2017-07-31 15:37:54

「其實係公司d野煩啫……」於是我將Felix同埋TT因為JPL單野而爭吵既事講出黎。

「所以依排TT都好唔合作，」我說。「加上Jason一路都係獨善其身，搞到好多野根本無人做，其實我地慢慢都打算cut緊一d賺唔到錢既projects。」

「又話總部嗰邊會派人黎既？」

「係呀，其實Felix都同人事部confirm過，援軍應該好快到，」我說。「不過就唔知援軍既質素如何……希望okay啦。」

「咁我地既布吉之旅洗唔洗取消呀？」

「咁又唔洗，」我說。「緊係照去啦。」

「但你上司之前喺泰國……」

「都唔關事……」我說。「佢去芭提雅，我去布吉。況且，我又唔係去玩人妖……」

正當我以為已經瞞過Amy之際，她忽然問：咁重有無其他野呀？

「下，無啦……」

「BB，我知道你有好多野都唔同我講。」

「點會呀……」我說。「我連加人工都同妳講啦……」

「BB，我唔知你煩緊咩，亦唔明點解你係都唔同我講，」她牽著我的手，認真地望著我，說：「但你可唔可以應承我一樣野？」

「咩呀？」

「無論你遇到咩困難，都千其唔好效棄，唔好認輸。」她說。「就當係為左我，你一定要贏，得唔得吖？」

「好，我應承妳，」我說。「我以我Karson Leung既名義發誓，無論將來遇到咩困境，我都唔會放棄，」我繼續說。「因為我一定要打贏返黎，照顧妳。」

我倆沿路走回河畔區。我想著剛剛許下的誓言。我對上一次發誓究竟係幾時？當時既誓言最終又有無實踐到？我真係完全無印象……

「我聽日都係唔去買口塞，」我說。「都係上網買啦。」

「你唔係好心急架咩？」

「緊係唔係啦，」我說。「都係費事出尖沙咀。」

我倆離開河岸，回到自己的單位樓下。

「不如諗埋下次去邊度旅行啦，」我說。「你話去巴黎好唔好？」

「做咩你突然之間又諗到咁長遠呀？」

「歐洲都兩三年無去過，係時候又要計劃下。」

我倆來到單位門外。打開門，又回到這個熟悉的家。

「我地返黎啦～」她說。「其實行下都幾好喎，可以當運動減下肥。」

「咁我地以後行多d。」我說著從後摟著她，輕輕親吻她的臉頰。

(第十一章完)

130巴打 2017-07-31 15:40:42

加速