而右下個隻就仲係牙肉入面，已經露出左少少… 因為佢頂起左少少肉成日藏食物，所以都係剝左佢。
31/7 我先去左剝上排個隻，由於已經生晒出黎，所以唔洗開刀。
個醫生手勢超好又快手…
12:40pm入到診症室，12:42pm已經出返去出面坐！
係診症室入面：醫生幫我打麻醉針，外面吉一針裡面再吉一針，坐起身浪下個口就訓返低開始了。
醫生：會有少少壓力呀下
然後我呀左一聲（其實唔痛），之後我就見到佢放低工具。
我：下！剝完架啦....?
醫生：剝完啦，你要唔要返隻牙？（個姑娘笑我…）
我當時仲好一臉疑惑（明明本身仲好緊張），淨係剝個個過程好似10秒都無！真係絕對快過打針！
剝完之後咬住紗布走人，要咬一個鐘。醫生開左d止痛藥話痛就食，另外再比左d紗布我換。
可能唔洗開刀既關係，所以完全無腫。麻醉藥過左後傷口位只係有少少痛，但剝呢隻牙我完全無食過止痛藥。
食野方面，當晚已經食緊雞翼+蕃茄通粉，食肉完全無問題，我之後仲食橙，唔會拿到傷口。飲食一切正常。
－－－－－－－－－－－－－－－－－－－－－－－－－－－－－－－－－－－－－－－－－－
13/8 朝早10:30pm 去開刀剝右下個隻，從X-ray睇隻牙係deep in bone，除左要開刀界牙肉之後仲要車骨。
經過之前箍牙同上次剝智慧齒，其實對Dr Nicholas已有一定既信心。
今次下排開刀呢隻由打針、浪口、開刀、縫針只係用左15分鐘！
有經驗既人都知道下排牙齒既牙腳係長d所以難剝d，加上要開刀同車骨，其實真係算好快！
照舊入到診症室就訓低打麻醉針，今次吉左大概5針左右，不過只有頭2－3針係痛，之後就感覺不大。
浪完口訓低，其實都唔知個醫生做緊乜，只會聽到鑽野既聲，同埋臨尾撬隻牙出黎個陣感覺到有壓力之外，其實成個過程之中都無乜感覺。
醫生最後幫我縫左兩次針，等個傷口拉埋d無咁容易攝野食入去，真係好細心！又溫柔…唔會扯親我個咀！
剝完醫生就開左幾包藥同紗布比我，同埋比返隻牙我，今次呢隻牙好完整好靚！😁
唔知係因為開刀定係打左麻醉針既關係，還是咬住紗布，走個時係覺得自己有腫腫地。
返到屋企咬左2－3個鐘紗布，換過3次。初初換真係成張都係血，成口都係血。之後見好少少就無咬。
咁其實我係訓覺既，所以就唔係點痛，不過我都食左兩粒panadol打左底先，到到中間訓醒係真係痛左一陣，但之後又無事。
醫生開比我既強力止痛藥我都未洗食。4pm左右我就浪口，已經無乜血喇…之後我就食粥。感覺良好，無痛、無腫…
晚上傷口亦已經無再痛，傷口都無再流血，飲食正常。認真睇下個傷口，好似縫得幾靚，完住無罅可以攝食物！
可能食左藥既關係，當晚11點倒就訓左（平時我都成4／5點先訓）一訓就訓到10點，好精神！
醫生都有同我講，覺得眼訓就要訓，身體要你休息你就休息，因為越休息得多就越唔會腫同埋會快d好返。
14/8 係開刀剝完牙既第1日，唔知係咪休息夠既關係… 果然，朝早起身，塊面一d都無腫，不過剝牙個邊就出現喉嚨痛。
食完藥就無事，全日都飲食正常，晚上仲去左食日本野。而且完全無出現面腫既情況，只係唔知係咪晚上無食藥既關係…
2am開始覺得傷口開始痛，同埋喉嚨又痛返！返到屋企即係仆去食藥…
15/8 今日係剝牙既第2日，起身一切正常，無腫無痛！
我真係好impress醫生既手勢（又可能係我自己身體好同夠休息），就然可以一d都無腫過…！
其實呢個醫生係我箍牙個個醫生，之前我介紹過朋友同埋我媽咪都係搵佢剝智慧齒，佢地個個都大讚手勢好，又話快又剩！
但我就唔係幾信…依家我信啦😂 其實我仲有另外兩隻智慧齒未出… 如果要剝我一定會搵返呢個醫生！
不過佢收費真係唔平
但我寧願搵個有料既醫生都唔想擘大個口成個鐘（我真係聽過架）
